Sikul hmasa Sikulpui leh Sikulsen Sorkarin Synod hnenah a hlân lêt

Aizawla Sikulpui leh Sikulsen chu Mi­zo­ram sorkarin kum 68 a enkawl hnuah nimin khan Mizoram Synod kutah an enkawl turin hlan lêt a ni. Sikul hlan lêtna inkhawm hi Sikulpui hall-ah neih a ni a, School Education department hotu te, Synod puipate leh Synod Education Board member-te an tel.

School Education secretary Esther Lalruatkimi chuan, sorkar rilru aṭang chuan Sikulpui leh Sikulsente mi dang hnena hlan chu thil uiawm tak a nih thu sawiin, "Amaherawhchu, kohhran dilna hi sorkarin a zah avang leh a ngaih pawimawh avangin remtih a ni," a ti.

Esther Lalruatkimi chuan, Task Group on Quarantine Facilities-te'n state páwn aṭanga lo hawte khung hran nan kohhran hmunhmáte hman a dil anga kohhrante'n phal taka an hmantir chu lawmawm a tih thu leh, kohhran inphalna an hriatin Mizoram fakna hriat tur a tam phah hle thu a sawi a ni.

Synod executive secretary (i/c Education) Rev. K Lalrin­mawia chuan, Synod Inkhawmpui 2010-in a rêl tawh a taka hmuh tur a awm ta chu Mizoram Synod-in lawmawm a tih thu a sawi a, "Kum 1898-a sikul din a nih khan kum khat chhunga hming ziak lut chu mi 60 an ni a, tuna he sikul, kohhranin a lak lêt leh pawh hian a bul ṭannaah chuan naupang 60 bawka bul ṭan leh chu a ngaihtuahtute rilruah a awm," a ti. Headmaster atan Synod Education Board chuan Upa Zonunmawia, Mission Veng a hman dawn thu a sawi.

School Education additional director James Lalrinchhana tarlan danin, sikul ram leh in bakah, Boys Middle School (Sikulpui)ah bung­rua lâk sawn theih 254 leh lâk sawn theih loh 23 a awm a, Boys Primary School (Sikulsen)-ah bungrua lâk sawn theih 173 leh lâk sawn theih loh 17 a awm. SDEO Aizawl South leh headmaster quarters-ah lâk sawn theih 18 leh lâk sawn theih loh 10 a awm bawk.

Sikulsen leh Sikulpui inhlan lêtna lehkhaah hian School Education department aiawhin secretary Esther Lalruatkimi leh Mizoram Synod aiawhin moderator Rev. R Lalchangliana ten hming an ziak.

Zosap missionary Zosaphluia'n kum 1898-a a din, kum 1905-a sikul building sak Sikulsen tih leh kum 1914-a sak Sikulpui building leh a ram te, sikul bungrua zawng zawngte chu Mizoram sokarin kum 1952-ah kohhran kut aṭangin a la a, April 22, 2020 khan Council of Ministers meeting chuan Mizoram Synod kuta hlan lêt a remti a ni.