Hmun dang aṭanga rawn lutte'n ram an lei huai takzet - CESJ
Centre for Environment & Social Justice (CESJ) chuan Land Revnue & Settlement (LRS) Secretary hnenah lehkha thawnin, ramdang leh state pawn aṭanga rawn lutte'n duh duha ram an leia an hralh theih lohna atana dan hmang ṭha turin an ngen. Vanglaini palai zawhna chhangin hmun dang aṭanga rawn lutte hian ram leina atan sum an sèn huai takzet thu CESJ hruaitute chuan an sawi.
CESJ hruaitute sawi danin, Mizorama huai tak taka ram lei leh lei tur zawngte hi Myanmar leh Manipur aṭanga Zo hnahthlak rawn lutte an ni ber a, Mizorama cheng mekte'n ram an lei ngamna aia to daihin an lei ngam a ni. Zo hnahthlak nimah se, ram leh state pawna awm an nih miau avangin Mizorama cheng Mizote angin ram lei theihna an nei ve lo.
LRS Secretary hnena lehkha an thawnah CESJ chuan, "Tunlai hian chhan hrang hrang avanga state dang leh ram dang aṭanga Mizoram rawn lutten ram an lei nasat thu a thang nasa hle a, hmun ṭhenkhatah phei chuan in 50 a sak theih a, hmun khata awm khawm nan ram an zawng tih kan hria a ni," an ti.
CESJ chuan, Mizoram chu Zo chi peng, ram dang leh state danga awmte’n an inpui a ni tih an pawm thu tarlangin, "Amaherawh chu, chhan hrang hrang vanga state dang leh ram dang aṭanga lokalte hian, Mizoram inrelbawl dan leh khawtlang kalphung an zawm tur a ni," an ti a, ram danpui leh a hnuaia dan hrang hrangte pawh an pawi sa in an zah tur a nih thu an tarlang tel.
CESJ chuan ram danpui leh a hnuaia dan hrang hrangte zawm tura beisei turin khawtlang dan leh ram dan ding laite kenkawh ṭhat hle a ngai tih an tarlang a, "Dan kenkawh khauh a ngai a ni. Heng ram lei leh hralh chungchangah hian, a hralhtu leh a lei tute hian ‘The Mizoram Land Revenue Act, 2013 bung kua (9) Section-98 clause 1 to 5’ nasa takin an bawhchhia. Hei hian kan ram inrelbawlna a palzutin a zah lo," an ti.
Inbawk khawm tumna awm anga lang chuan chibil ang zawnga inbawl hranna leh inlak hran tumna a thlen thei tih tarlangin CESJ, "A rang thei ang bera tih tawp vat a ngai a ni. Dan thlawhchhan tur ṭha tak kan nei chunga hetiang ang thil ngawihbo san hi thil thiang pawh a ni lo," an ti a, a duh duhin ram an hralh leh an lei hi he dan hmang ngeia ti tawp tur leh tun chinah ram lei leh hralh hi dan hnuaia kal pui tawh tura a rang thei ang bera hmala turin LRS Secretary chu an ngen a ni.