CADC CEM kum li tang tur leh cheng nuai li chawi turin hrem

Aizawl District Court-a special judge (Prevention of Corruption Act) Dr HTC Lalrinchhana chuan, Chakma Autonomous District Council (CADC) chairman Kali Kumar Tongchangya chu CEM a nih laia sum a tihchingpen avangin kum li chhung jail tang tur leh Rs 4,00,000 chawi turin a hrem.

Special Judge hian Kali Kumar Tongchangya hi September 25, Thawhṭanni khan thiam loh chantirin, nimin khan hremna a puang a, kum li chhung jail tang tur leh Rs 4,00,000 chawi turin a hrem ta a ni. Pawisa a chawi tur hi a pe thei lo a nih chuan kum hnih dang jail a tan belh ang.

KK Tongchangya hi thubuai pahnihah thiam loh chantir niin, kum li chhung jail tang tur leh cheng nuai 2 chawi tura hrem ve ve a ni a, kum upa tawh a nih bakah ama mimal tan sum hi hlemhlet pui a nih loh avangin jail tang tura hremna kalkawp tir niin, kum li a tang dawn tihna a ni. Pawisa erawh cheng nuai 4 a chawi a ngai thung.

Tarlan tawh angin, thubuai chhuitu Anti Corruption Bureau-ten KK Tongchangya-a'n CEM a nih laia a sum tihchingpen an hmuhchhuah chu cheng vbc. 1.79 a ni.

KK Tongchangya CADC Executive Secretary cum DDO Digamber Chakma chuan dikhlel takin Rs. 9,03,773 a pe chhuak a, kum 2013 CADC inthlan dawnah Congress Party candidate mi 19-te hnenah campaign-na atan CADC sorkar sum chu pek chhuah a ni bawk a, a vaia sum chingpen chu cheng vbc. 1.79 a ni.

ACB-hian heta pawisa chingpen aṭang hian cheng vbc. 1.26 chu an man let leh a, hei hi Mizoram sorkar sum bawma dah turin Special Court chuan a ti.

Court-in hremna na zawk a pek chhan

▶ Tualchhung sorkar (local government) teah hlemhletna hi a hluar zel chuan hlemhletna hi a ṭai darh nasa thei hle dawn a, hremna awmze nei pek a ngai.

▶ Hlemhletna pawisa hi tam tham tak cheng vbc. 1.79 niin, hremna na zawk pek ngei a ṭul.

▶ Tuna hmun ṭhenkhata politics kal sual mek angah hian, district council inrelbawlna hi court rorelna rintlak tak hmang deuh chauh a siamṭhat theih a ni tawh. Chu siamṭhat hna chu a huamchhunga mi rethei bak berh leh chhumchhiate hamṭhatna tur ber a ni ang.

▶ Kan ram kalsiamah political party bil hamṭhatna tura mipui sum pawhpen hi a awm châwk niin a lang a, thuhnu dawn taka hremna hi pek a nih loh chuan mipui nawlpuiin a tùr ve renga ngaia pal zam hun a thlen palh a hlauhawm.