Aizawl mipui 4,45,000 tuia chawm thei tura tih 37 MLD Water Treatment Plant hawn a ni
Aizawl mipui 4,45,000 tuia kum 2033 thleng chawm zo tura duan, Augmentation of Aizawl Water Supply & Construction of 37 MLD Water Treatment Plant chu nimin khan a taka hman turin commission a ni a; Aizawl khawpuia mi pakhat hnenah ni tin tui litre 135 sem theih tura ruahman a ni.
UDPA department hnuaia State Investment Program Management and Implementing Unit (SIPMIU) thuchhuah tarlan danin, 37 MLD Water Treatment Plant hi September 22-24, 2023 chhung khan diesel engine hmangin enchhin (trial run) a ni a, enchhinna hi a hlawhtlin hnuah nimin khan commission a ni.
He project hi kum 2016 aṭanga kalpui ṭan a nih thu tarlangin SIPMIU chuan, "Aizawl khawpuia chengten tui thianghlim hnianghnar zawka an hmuh belh theih nan Greater Aizawl Water Supply Phase I & II khuahna thlang, Tlawng lui dung km. 8 a hla, Mualkhang Tanhril ramah 37 MLD Water Treatment Plant thar hi sak a ni. Heta ṭang hian Laipuitlang tuizem lianah tui tih thianghlim sa hi pipe feet 2 leh a chanve hawltlanga lian, km 11 zeta thui hmanga pump chhoh a ni ang," a ti a; ni tin tui litre maktaduai 37 pump thei tura ruahman a ni.
Deputy chief minister Tawnluia, UDPA minister ni bawk chuan he project-a hna thawktu te leh ṭawiawmtu department hrang hrang te, local council te leh project thawhpuitu mimalte hnenah lawmthu a sawi a; hmabak tlem la awmte pawh zawh thuai a nih theih nan hna thawktute chu theihtawp chhuah zel turin a fuih bawk.
37 MLD Water Treatment Plant
* Kum 2016 aṭangin a project hi kalpui ṭan a ni.
* India ram khawpui liana chengten ni tina tui an dawn ṭhin ang, mi pakhat tan litre 135 chu Aizawl khawpuiah sem theih tura ruahman a ni.
* Plant hi kum 2033 thleng Aizawl mipui 4,45,000 chawm zo tura duan a ni.
* Trial run-ah hian diesel engine lian, 1475 HP hmangin Laipuitlanga tuizem lianah tui thianghlim pump thlen a ni
* Sub-station leh electric hmanga pump-na tur bun fel a ni tawh.
* Sihhmui aṭanga 33/11 kV power supply line pawh ngawrh taka thawh leh enchhin mek a ni.