Governor-in chawimawina tangkapui a hlan

Governor Dr Hari Babu Kambhampati chuan nimin khan Raj Bhavan-ah Assam Rifles sipai zinga hnathawk ṭha zual thlanchhuah mi 23-te hnenah chawimawina tangkapui, Governor’s Gold leh Silver Medal a hlan a; state sorkar hnuaia dan leh thupek kengkawhtute ṭha taka thawhpui chhunzawm zel turin a fuih.

Governor Dr Hari Babu Kambhampati chuan, ram venhimna kawngah Assam Rifles-ten Mizoram ramri hrulah hna pawimawh tak an thawk tih a sawi a, "An thawhrimna leh state sorkar hnuaia thawkte an thawpui ṭhat avaning ralthuam, ruihhlo leh dan loa bungraw tawlh tam tak man a ni tawh. State sorkar hnuaia dan leh thupek kengkawhtute ṭha taka thawhpui chhunzawm zel in, Mizoram himna leh muanna atan theihtawp chhuah chhunzawm zel ang che u," a ti.

Mizoramin kumina MLA inthlanpui a hmachhawn turah Assam Rifles-te chu an duty-na hmunah fimkhur leh zual turin Governor chuan a chah bawk.

He hun hi Assam Rifles (East) inspector general Maj. Gen. Vinod Kumar Nambiar-a'n a kaihruai a; chief secretary Dr Renu Sharma, DGP Anil Shukla, 23 Sector Assam Rifles DIG brigadier Girish Upadhya bakah, Assam Rifles officer-te leh mi pawimawh dangte an tel.