Pathian leh kan ram tan titu MNF-te'n NDA an zawm tlat hi a mak - Duhoma

Chalfilh ZPM Joint Block Party Meet chu September 25, Thawhṭanni khan Phullen khuaah neih a ni a, an hun hmanpuitu ZPM Leader Lalduhoma chuan MNF-te'n NDA an zawm tlat mak a tih thu a sawi.

ZPM Leader chuan Pathian mite’n he leiah Pathian ram din a, rorelna ṭha din tur leh vanram ringawt thlir loa, he leia Pathian ram din hi chu Bible min zirtir dan a nih thu sawiin, "Kan unau MNF, Pathian leh kan ram tan ti tuten NDA an zawm tlat mai hi a mak. Kan hnam leh kan sakhuanaah hian a mual boin an bo. Tharum hmanga Kashmir an awp beh dan te ngaih­tuahin Mizoramah pawh article 371G harsa taka kan sual chhuahte hi an rawn namthlu leh duh mai lo ang tih a sawi theih loh," a ti.

NDA term khat an sorkar leh a nih ngat chuan Mizoram tan pawh hian a him lo hle tawh tih sawiin Lalduhoma chuan, chutiang sorkar thlawp tute chu MNF-te an ni tih Mizo mipuite hian kan hriat a ngaih thu a sawi.

ZPM Leader chuan Congress Party-te'n an hun laiin sum enkawl thiam inti hle mah se, MNF sorkar kha leiba tam tak an hnutchhiah tho tih sawiin, "Leiba hi GSDP atang zela chhut a ni a, kan leibat zat kan CM-in a sawi thin dan chu chhiarkawp dik lo a ni. Heti zawnga kan sawrkar lai mek ten mipui an zirtir hi thil dik lo a ni. ZPM a lo sorkar a nih chuan kan leiba te ti hniam turin theihtawpin tan kan la nghal dawn," a ti.

Lalduhoma chuan leiba chhawm tur tam hle mah se, a kum khatna aṭangin lo neitute puih nan sawhthing an lei dawn tih sawiin, "Hei bakah hian ZPM chuan party sorkar ni lo, mipui sorkar din kan tum avangin dinchhuah tum tak takte kan pui dawn," a ti a, central atangin scheme tha tak tak MSME-te pawh mipui hnenah hrilh hriain, hma an lak pui tur thu a sawi.

Hriselna chung­changah Mizoram chu cancer tam lamah pakhatna kan nih thu sawiin ZPM Leader chuan, "Kan mipate an thi hnem em em a, hengte hi sorkar anga hmalakna tur ṭul em em a ni. Mahni intihlum kan tam chho zel a, India ramah nupa inṭhen tamna ber kan ni. Chutih laia inkhawm uar ber hnam kan ni bawk site hi thil inhmeh lo a ni a, chuvangin Mizoram politic-ah hian Pathian ram a thlen hi a ṭul em em," a ti.

ZPM thuchhuah tarlan danin, inkhawmah hian ZPM Leader hian an party-ah mi 562 a lawmlut.