Kan sorkar leh ang tih kan ring hmak - Lalruatkima

MNF Tuikual South Unit-II chuan nimin khan YMA Jubilee Run, Tuikual South-ah mithar lawmluh inkhawm leh intuaitharna hun an hmang a, he hunah hian MNF adviser Lalruatkima, minister chuan an sorkar leh ang tih an rin hmak thu a sawi.

Lalruatkima chuan kan hma maiah kan inthlang dawn a, Pathianin an party chu Pathianin a hruai zel tih sawiin, "Kan sorkar leh ang, tih hi ka ring hmak a ni. Party pahnihte an leader-ah an buai ve ve a, duh lotu an tam hle. Chutih laiin keini chu Pu Zoramthanga hruaina hnuaiah lungrual takin nationalism meichher chhi chungin hmalam kan pan mek a ni. He hnam hian engtik niah emaw chuan zalenna famkim kan la nei dawn, ṭhangthar zelah chu chu kan tuh a ngai," a ti.

ZPM chungchang sawiin MNF Adviser chuan, "Candidate an thlak an thlak a, damṭhat loh pawh ngam awm loh khawpin an inthlak nasa. An leader-ah an buai a, an chhungkua an buai em em a, thil theih loh, duhthusam mai an zuar nasa em em a ni. Mipui an harh mek a, ballon hampuar, a rei deuh hnua thep vuai chun ang mai hi ZPM dinhmun chu a ni. A tirah chuan an mar ṭha viau a, tunah chuan a thep nasa ta mai," a ti a, a thep belh zel niin a sawi.

Lalruatkima chuan an hotute chu ram leh hnam tana nunna hlana thi ngam an nih thu sawiin, "Mahni hnam tana thih ngam lupua zalenna sual tawhte hi khawvelin an dah hniam ngai lo a, an ngai sang em em a ni. Sorkar dang leh sorkar laipui dawr kawngah pawh zah a kai em em a ni. Kan ram, kan hnam leh sakhua a him hi MNF dinchhan leh thil tum bulpui ber a ni a, a ni zel ang," a ti.

Pathianin MNF a hruai thu sawiin MNF Adviser chuan, "Kum hnih chhung hna thawk hleithei loa kan awm chhungin hmasawnna hna ram pum huap pawhin kan thawk nasa hle. Kha hripuiah khan meialh en a, chhuanchham awm loin kan paltlang thei a, he hnam tana Pathian thiltih mak hi a ropui hle a ni," a ti a. "Assam nen ramriah kan buai a, silai a puak hial a nih kha," tiin, Assam lakah an tlawm loa, ramriah nasa takin hma an sawn zawk thu a sawi.

MNF thuchhuah tarlan danin, MNF Advi-ser hian an party-ah mithar 91 a lawmlut.