Mamitah khum 100 awmna damdawi-in hawng

Health & Family Welfare minister Dr R Lalthangliana chuan nimin khan khum 100 awmna Mamit District Hospital (IPD Block) a hawng a; "Hmasawnna ruhrel chuan thawktu (man power) a mamawh belh dawn a, hmalak zel a ni ang," a ti.

Dr R Lalthangliana chuan, Mamit chu India rama Aspirational District 115 zinga pakhat a nih thu a sawi a, "Aspirational District atan hian thlur bing pawimawh tak tak pahnih - hriselna ngaih pawimawhna leh zirna ngaih pawimawhna a tel. Mamit district-a W Phaileng PHC chu Community Health Centre-ah hlankai a ni a, hmasawnna ruhrel chuan thawktu (man power) a mamawh belh dawn a, hmalak zel a ni ang," a ti.

Mizoramah Clinic 235 hawn a nih thu sawiin Minister chuan, "Hengah hian hmun kilkawrah pawh nau neihna facility-te pawh a awm tawh. Mizoram Health Strengthening Project hian mamawh zualpui tuamhlawmna a kalpui mek a, Mamit bakah Siaha, Lawngtlai leh Champhai Hospital-ah khum 100 awmna damdawi-in hawn tawh niin, hmabak lian tak Serchhipah kalpui mek a ni," a ti a; Kolasib district-ah khum 100 awmna damdawi-in sak mek a nih thu a sawi.

Bialtu MLA H Lalzirliana leh Dampa bialtu MLA Lalrintluanga te pawhin thu an sawi.

Mamit district medical superintendent Dr Lalrinfela H tarlan danin, Mamit District Hospital hi Power Finance Corporation (CSR Initiative) aṭanga hmuh Rs 16,93,35,000 senga sak a ni a, contractor chu Zamzo Engineering, Construction & Consultancy a ni.