MLA-in MPSC leh MSSSB pisa a tlawh

Human Resource Development Board vice chairman Dr L Thangmawia, MLA chuan nimin khan Mizoram Public Service Commission (MPSC) leh Mizoram Sub-ordinate Service Selection Board (MSSSB) pisa a tlawh.

MPSC hotute chuan, exam an buatsaih reng rengah Mizo ṭawng middle school standard qualifying exam atan a tel zel tawh dawn tih an sawi.

Dr L Thangmawia chuan, Mizoramin sorkar laipui anga hna sang zawk (Group A & Group B Gazette) la tur MPSC leh a hnuai lam hna atana MSSSB a nei chu ṭhalaite tan thil lawmawm tak a nih thu a sawi a, "Mizoram sorkar hnuaia hna lak chungchangah MSSSB leh MPSC-te in la hming ṭha hlein kan lo hria a, in hna lak danah sawiselna tur awm loa a tling leh tlak zel la chhunzawm ang che u, " a ti a, mipuite tan an hnathawh dan zirchiang tura tlawh a nih thu a sawi.

MPSC hotute chuan, MPSC pisa thuamṭhat nan Mizoram sorkarin tunhnaiah cheng nuai 460.28 a pek thu leh hna lak dan ṭha zawk leh mumal zawk an duante chu Mizoram sorkar pawmpuina an hmuh tawh thu leh chutiang ang chuan kum thar aṭangin Combined Examination hrang hrang – Mizoram Engineering Service, Mizoram Health Services, Annual Examination for Group ‘B’ (gazette) posts leh Agriculture & Allied Services (technical) examination-te nei tura an inbuatsaih mek thu an sawi.

MPSC Evaluation and Scrutiny Guidelines, 2022 leh MPSC (Examination) Guidelines, 2023-te peihfel a nih tawh MPSC hotute chuan an sawi a; tun MLA term kal lai mekah post hrang hrang 81 atan hna an lak thu te leh post paruk atan advertisement an chhuah mek thu leh post dang 13 buaipui thar tur sorkar aṭanga an dawn mek thu an sawi.

MSSSB hotute chuan, kum 2020 aṭanga office luaha hnathawk ṭan an nih thu te, direct recruitment-ah mi 243, LDE mi 288, departmental exam mi 216, promotion mi 2906, regularisation mi 122, confirmation mi 1366, conversion mi 47 leh absorbtion mi 43, a vaiin mi 5,231 hna an tih fel sak hman thu an sawi.

Hna hrang hrang 18 lakna atan exam buatsaih an la hmabak mek thu leh hna pali atan September 28-29, 2023 ah exam an buatsaih dawn thu te, hna dang 14 atana exam hun tur erawh an la tih fel rih loh thu te MLA hi an lo hrilh.