Super Specialty Cancer & Research Centre sak tur lungphum Chief Minister-in a phum

Chief minister Zoramthanga chuan September 25, Thawhṭanni khan Zemabawka Mizoram State Cancer Institute-ah Mizoram State Super Specialty Cancer & Research Centre sakna tur lungphum a phum. CM chuan, "Cancer enkawlna ṭha leh changtlung tak nei mah ila, a pawimawh zawk chu cancer hospital luh ngai lo tura inbuatsaih a ni," a ti.

Zoramthanga chuan, Mizoramah cancer vanga thihna a tam tih sawiin, "He research centre hian chu kan harsatna chu nasa takin min ṭanpui thei dawn. Kan rama cancer vei kan tam lutuk hi ka phak tawkin ka ngaihtuah ve nasa ṭhin a, kan mithiamte'n an sawi angin zuk leh hmuam kan ti nasa lutuk hi a nih hmel berin a lang. He hmunah hian cancer enkawlna ṭha leh changtlung tak nei mah ila, a pawimawh zawk chu cancer hospital luh ngai lo tura inbuatsaih hi a ni zawk," a ti.

Mipuiten nunphung hrisel leh thianghlimna lam an uar deuh deuh a ṭul thu sawiin Zoramthanga chuan, "Chutianga kan invawng chunga loh theih loha luh ngaite tan helaiah Super Specialty & Research Centre changtlung tak kan lo buatsaih ve thung dawn a ni. Sorkarin hriselna leh zirna a ngaih pawimawh avangin covid harsatna kan tawh lai pawhin anni pahnihte tihhmasawn zel nan sum leh pai kan pe chhuak ṭha hle," a ti a; mipuite'n nunphung thianghlim an zawh a pawimawh thu a sawi.

Health minister Dr R Lalthangliana pawhin thu sawiin, Mizorama hma­sawnna hnathawh malkhaia sum lian ber tur Super Specialty Cancer & Research Centre sakna tur lung phum a ni chu ropui a tih thu a sawi a, "Hmarchhak state-a la awm ngai lo, India huap pawha cancer enkawlna leh zirbingna ṭha berte zinga mi ni phak tura beisei a ni. Project sum 20% hi Mizoram sorkarin kan lo tum ve tur a nih avangin Chief Minister-in phal takin min remtih sak a, kan lawm hle," a ti.

Mizoram State Cancer Institute director Dr Jeremy L Pautu-in a tarlan danin, Super Specialty Cancer & Research Centre hian khum 200 awmna damdawi-in a nei dawn a, cancer natna enkawlna khawl ṭha ber bera thuam a nih dawn bakah, zirbingna hmun (research centre) a ni dawn bawk. A project pumpui man hi cheng nuai 70,000 a ni a, Mizoram sorkarin nuai 16,000 a tum ve ang. Hna hi kum 2028 kumtawp lama thawh zawh hman beisei a ni.

Mizoram State Super Specialty Cancer & Research Centre din tur hian February 23, 2023 khan Mizoram sorkar leh Japan International Cooperation Agency (JICA) chuan inremna an ziak.

June 7, 2022-a Health Minister leh JICA hotute minister pisaah an inkawmnaah a, Mizoram State Super Specialty Cancer & Research Centre chu Japan University ṭhate nen thlun zawmin, thiamna tipung tura thawhhona leh inkungkaihna siam a ni dawn niin sorkar thuchhuahin a tarlang.