Education Minister-in ‘Thûl 2023’ a hawng

Mizo High School chuan nimin khan an sikulah thiam thil chi hrang hrang entirna, ‘Thûl 2023’ an buatsaih a; School Education minister Lalchhandama Ralte-in hmanpuiin, Mizo High School website www.mizohighschool.edu.in a hawng nghal.

Lalchhandama Ralte chuan, NEP 2020-in zirna pangngai leh skill development chu a kaikawp vek tih a sawi a, "Hemi mil hian zirna kalpui dan tur pawh ruahman a ni a, sikul ipte ah loh ni te pawh siam a ni. Ram changkangho hi skills-ah an sang a, Pathianin talent a pekte peipunga pho chhuak tura an beihna a ropui thei hle, " a ti a; Thûl 2023-a zirlaite thiamna pho chhuah chuan eizawnna tlak thiamna nei turin a puih zel a beisei thu a sawi.

Khualzahawm Lalsangliana, School Education director pawhin thu sawiin, quality education nei turin mahnia tihchhin peih a ṭul thu a sawi a ni.

He hunah hian Education Minister hian zirlaite thu leh hla ziah tarlanna 'Ink on Paper' a tlangzarh a; School Education Director chuan Lalnunpuia Hrahsel ziah ‘Englo’ tih lehkhabu a tlangzarh bawk.