Serchhip district silver jubilee lawm a ni

Serchhip district din champha vawi 25-na (silver jubilee) chu nimin khan bawrhsap David Lalthantluanga hoin DC conference hall-ah lawm a ni a; Bawrhsap chuan DC pisa tualah jubilee lungphun a hawng a, Serchhip district a pian theihna tura hmalatu, hruaitu hmasate hnenah memento hlan a ni.

Serchhip khawtlang hruaitute leh mi ṭhahnemngaite'n Serchhip district a pian theih nan kum 1984 aṭangin hma an la ṭan a, kum 1986-ah Joint Action Committee for District Headquarters, Serchhip din niin, he pawl hming hian July 2, 1987 khan sorkarah district dilna thehluh a ni. Kum 1990-a din Special Committee on Re-organisation of Districts and Sub- Division, Serchhip chuan sorkarah Mizoram chu district pangah ṭhen ni se, tiin rawtna an thlen.

Kum 1996-ah Serchhip District Headquarters Demand Committee din leh niin, November 17, 1997 khan sorkarah Mizoram chu district pariata ṭhen rawtna bakah, district pariat ramri tur leh headquarters tur ṭheuh ziahlanna an thehlut a ni.

July 29, 1998 khan sorkarin district thar siamna tichhuakin, Aizawl district chu district pathum - Aizawl district, Aizawl North district leh Aizawl South district-ah ṭhen a ni a; June 3, 1999 khan district thar pathumte hming thlak a ni a, Aizawl South district chu Serchhip district tia vuah a ni ta a ni.

Serchhip DC pisa chu September 15, 1998-ah hawn a ni a, DC hmasa ber chu Lalkungi Hnamte niin, Serchhip district-ah hian a din tirh a ṭangin DC 15 an awm tawh a ni.

Serchhip district hian India rama district zawng zawngah ziak leh chhiar thiam tamna ber dinhmun a luah mek a; sub division pathum - Serchhip, Thenzawl leh N Vanlaiphai te; RD block pahnih - Serchhip leh East Lungdar bakah, thingtlang khua 40 leh notified town pathum a awm mek a ni.