KHAWTHLIR

IR-in thisen pe

Mizo 5th IR Battalion chuan an din champha vawi 15-na lawm nan nimin khan Synod Hospital Blood Centre tan thisen unit 32 an pe a, petute mipa 30 leh hmeichhia pahnih an ni.

CM-in chawimawina hlan

Chief minister Zoramthanga chuan nimin khan a pisaah tun hnaia Mizoram University-in post graduate result a tihchhuaha a bial Aizawl East-I chhunga MZU IMBA gold medalist Vanlalkroshlua Ngente s/o Vanlalhruaia Ngente, Sihphir leh ICFAI University MA English topper Lalmuanzuali Royte d/o Lalthlamuana Royte, Sihphir te hnenah chawimawina citation leh laptop a hlan.

Free health clinic

Minister R Lalzirliana chuan nimin khan Selesih Local Council House-ah a thlawna inentirna, free health clinic a hawng. Civil Hospital Aizawl aṭangin Dr Lalnunmawii, Dr C Lalrinchhana, Dr Lalthlamuana leh Dr Lalnuntluangaten damlote dinhmun an en a, a thlawnin damdawi sem nghal a ni. Free health clinic hi vawiinah Durtlangah leh naktukah Leitan Ramtharah neih leh a ni ang.

Pisa kai hun

GAD chuan nimin khan Mizoram sorkar hnuaia hnathawkte pisa kai hun tur a tichhuak a; October 3, 2023 aṭangin February 16, 2024 thleng zing dar 9 aṭanga tlai dar 4 inkarah Mizorama sorkar pisa leh hmarchhak state-a Mizoram House-te hawn a ni dawn. New Delhi, Kolkata, Mumbai leh Bengaluru-a Mizoram House-te chu zing dar 9:30 aṭanga tlai dar 5:30 thleng hawn a ni ang.

Minister-in hawng

HTE minister Dr R Lalthangliana chuan nimin khan Zawlnuam College-ah Multipurpose building thar a hawng a; "NEP 2020-in a phût angin State University chu hmalam huna din tur a ni a, chumi a tan chuan sorkar pawhin hma a la mek a ni," a ti. Multipurpose building hi cheng nuai 100 sengin Sky Ridge Construction & Consultancy Services-ten an sa. Zawlnuam College-ah hian zirlai 80 leh zirtirtu 20 an awm mek a ni.