May 26, 2020 aṭangin Aizawlah Thlawhtheihna thlâwk ṭan dawn

India rama thlawhtheihna thlâwk chungchanga thuneitu sang Director General of Civil Aviation (DGCA) chuan May 25, kar leh Thawhṭanni aṭangin India ram chhung bikah thlawhtheihna thlâwk leh ṭan turin ruahmanna a siam a; Aizawl (Lengpui Airport) ah chuan May 26, Thawhlehni aṭangin a thlawk ṭan ang.

DGCA-in ruahmanna a siam, approved domestic summer (provisional) ang chuan, Aizawl (Lengpui Airport) bikah chuan Air India chauhin thlawhna an thlawhtir rih dawn a; chu'ngte chu Aizawl leh Kolkata inkar te, Aizawl leh Imphal inkar leh, Aizawl leh Silchar inkara thlawk turte a ni. Thlawhna (aircraft) thlawk tur chu passenger 124 aia tlem lo phur thei Airbus 319 vek a ni ang.

Covid-19 hripui léng vanga India rama thlawhna thlâwk tihtawp a nih hma khan Aizawl (Lengpui Airport)-ah Air India, GoAir leh IndiGo Airlines-te an thlâwk mek tih GAD Aviation Wing hotute chuan an sawi a; tuna DGCA ruahmanna tharah chuan GoAir leh IndiGo-te chu Aizawlah an thlâwk rih dawn lo a ni.

DGCA ruahman anga thlawhtheihna a thlawh leh dawn tâk avangin Health & Family Welfare department chuan Covid-19 hripui laka Mizoram a him zel theih nan ruahmanna siam turin nimin khan Lengpui Airport an tlawh a; thlawhna hmanga Mizorama rawn lutte dawnsawn dan tur an duang. Ruahmannate chu la tichhuah a ni ang.