District-ah Kângmei Ven Hapta hmang

Mizoram district hrang hrangah nimin khan Fire Prevention Week hman ṭan a ni. Champhaiah chuan Venglai Community Hall-ah hman a ni a, Champhai DC mawhphurhna la mektu Mark Lalthanliana, additional DC-in a hawng.

Mark Lalthanliana chuan, Kângmei Vên Hapta chhung chauhin kângmei ven tur a ni lo tih sawiin, "Kângmei ven hi khâr a ni dawn lo a, kan thawk chhunzawm zel tur a ni," a ti a; Champhai district mipuite chu kângmei tichhuak lo tur leh a chhuah palh pawha theihtawp chhuaha ṭhelh mih vat tum turin a chah. YMA Sub-headquarters, Champhai president VL Chama Hnamte leh Champhai DFO Lalduhthlana ten thu an sawi bawk.

Serchhip-ah chuan DC meeting hall-ah hawnna inkhawm neih a ni a, district bawrhsap Dr Lalzirmawia Chhangte-in a hawng a; kângmei laka ram venhim dan tur ruahmanna hrang hrang an rél nghal.

Lalzirmawia Chhangte chuan, kângmei chhuak ṭhin chu ramin a tawrh nasat thu a sawi rualin, "Kan rama mipui tam zawkte'n lo neia ei an la zawn avangin ram tihkan palh theihna remchang a tam em em a, mi tin kan fimkhur a, ram tikâng lo tura ṭan kan lâk a ṭul hle a ni," a ti a; mipuite chu kângmei laka ram a him theih nana tlawmngaih chhuah tur leh uar lutuk awm loa inzirtir turin a ngen.

Lawngtlaiah chuan DC pisa conference hall-ah hawnna inkhawm hman a ni a, Lawngtlai additional DC K Laltlawmlova'n a hawng. K Laltlawmlova chuan, "Kan ram hian keimahni lo chu hmangaihtu tur a neih loh avangin kan ram kan humhalh a ṭul. Kângmei chhuak vanga ramngaw, in leh lo kâng ral awm ṭhin veng turin sorkar leh tlawmngai pawl hrang hrangte ṭan rual a ṭul tak zet a ni," a ti a; kângmei vèn kawnga sorkar hmalakna thláwp tur leh lo hâl hun atana sorkar hun ruat zàwm turin mi tin a ngen.

Week hawnnaah hian Lawngtlai deputy conservator of forest (Wildlife) C Lalthankima kaihhruaiin kal khawmte'n ram tikâng lo tur leh ramngaw leh nungchate humhalh tura thutiam an sawi rual a ni.

Mamitah chuan IPR Conference Hall-ah Fire Prevention Week hawnna inkhawm neih a ni a, district bawrhsap Dr Lalrozama'n a hawng. Bawrhsap chuan, khawtlang hruaitu te, sorkar hnathawk te, tlawmngai pawl hrang hrangte leh mipuite chu ram tikâng lo tura theihtawp chhuah turin a sáwm.

Mamit DFO Lalnunsanga Khawlhring sawi danin, kum 2019 chhung khan Mamit district-ah hmun 142-ah kângmei chhuakin, chu chuan ram hectare 160-a zau a awh a; kum 2019 chhung khan Mamit district-ah ram tikâng hrem an awm lo.

Khawzawl Electric YMA Hall-ah pawh Kângmei Vèn Hapta hawn niin, district bawrhsap H Lianzela'n a hawng. Inkhawm chu Khawzawl Joint VC chairman H Zoremsanga'n a kaihruai a; DC H Lianzela bakah, Khawzawl DFO PC Lalchhandama, Khawzawl SP Lalchunglura leh Khawzawl Joint YMA president Lalsanglura Hnamte ten thu an sawi a ni.

Fire Prevention Week hi Mizoramah kum 2000 aṭangin kum tin hman a ni a, kumin hi a vawi 21-na a ni. Kum 2009 aṭangin district leh khua, kângmei veng ṭhate hnenah lawmman sem ṭan a ni bawk.