Lirtheia chetsualnaah mi pathum thi

January 27-29, 2016 chhunga hmun pathuma lirtheia chetsualna avangin mi pathum an thi a, hliam an awm bawk.

January 27 tlai dar 5 vel khan Vairengte Zalen Vengah LPK truck-in Aldrin Lalrohlua (11), Phainuam a chíl hlum. Thu dawn danin, Aldrin Lalrohlua hi a ṭhianpa nen Vairengtea NH-54 kawngpui pawhtu kawng chhukah thirsakawrin an inphur a, kawngpuia LPK truck tlân laiah inbarh lutin, Aldrin chu truck ke hnungin a chíl a, a hmunah a thi nghal a ni.

January 28 tlai dar 3 vel khan Sairang thlang, Buichali lei bulah truck leh bike inpelh sual avangin Thomas Lalrindika, Lengpui a thi. Thu dawn danin, Thomas Lalrindika hi a ṭhiante pahnih nen bike pakhatah inphurin Sairang an pan a, truck nen an inpelhna lamah an chesual a ni.

Nimin zing khawvar hma, dar 1 vel khan truck MZ-01 D-5488, Zomawi Gas Agency ta tur gas phur chu Lunglei district-a Hauruang dáiah chesualin kawng thlangah a tlân liam a, mi pathum chuang zinga driver Taiyabur Rahman Choudhury (23) s/o Mohammed Ali Achoudhury, Bhrahman, Cachar district, Assam a thi.

Hauruang YMA leh ALMA Youth Adventure Club, Chanmari ten chhanchhuah hna thawkin, nimin zing dar 5 velah driver chu thiin an hmu a ni.