Mizoramah phár vei mi 1,504 hmu tawh

Health department huaihawtin nimin khan Aizawla IPR Auditorium-ah 'World Leprosy Eradication Day' hman a ni a, Health minister Lal Thanzara khuallian a ni. He hunah hian Mizoramah phár vei mi 1,504 hmuh chhuah a nih tawh thu an tarlang.

Lal Thanzara chuan, phár natna tihrêmna ni hman a ni chu a thlawn dawn lo tih sawiin, "Mizoramah phár a awm lo emaw kan tih laiin tam tak kan lo la nei a, India sorkar chuan heng natna, záwnghri, zenghri leh phár natnate do nan nasa takin hma a la a ni," a ti.

Minister chuan, National Leprosy Control Programme chu National Leprosy Eradication Programme tia thlak a nih thu sawiin, "Phár natna veite chu multi drug therapy (MDT) hmanga nasa taka enkawl an ni a, phár natna pawh a tlahniam nasa em em a ni," a ti a; kum 2005 aṭangin elimination stage-ah Mizoram a awm tawh a, mi 10,000 zela mi pakhatin phár a vei ang a nih thu a sawi. Mizoramah phár vei thar kum tin an awm nia sawiin, Lal Thanzara chuan, "Inthlahdah theih a ni lo a, tun aia nasaa hma kan lak chuan hlawhtlinna nasa tak kan nei thei a ni," a ti.

Mizoramah phár vanga thi leh piangsual ta sawi tur an la awm lo nia sawiin, "Hei hi thawktute'n an hmuh chhuah hma vang leh an thawhrimna vang a ni a, India ram hmun dang nen tehkhin chuan kan thawktute hian an thawk ṭha hle a ni," a ti.

Health Minister sawi danin, kum 2014-15 chhungin Mizoramah phár mi 21 enkawl a ni a, kum 2015-16 ah chuan tlahniamin, mi 18 enkawl mek an ni. Phár veite hi a thlawna enkawl an ni.

He programme hi Health principal director Dr K Ropari’n a kaihruai a; state leprosy officer Dr Chawngthansiami leh dermatologist Dr Lalthlengliani ten phár natna an sawifiah.

Dr Chawngthansiami tarlan danin, Mizoramah kum 1983 aṭanga January 2016 thleng khan phár natna vei hmuh chhuah zat chu mi 1,504 an ni a, chu'ng zinga 1,498 chu enkawlna pek an ni. April 1, 2015 aṭanga January 2016 inkarah phár vei hmuh chhuah mi pali an awm a, an zinga pathum chu Lawngtlai district-a mi niin, pakhat chu Lunglei district-a mi a ni.