Thenzawla golf course atan Cheng vbc. 94 ruahman a ni

Tourism department chuan cheng vbc. 94 sêngin Thenzawlah golf course a siam dawn. Tourism minister John Rotluangliana chuan, golf course hmangin khualzin hîp luh a nih tur thu a sawi.

John Rotluangliana hian nimin khan Congress Bhavan-ah thu sawiin, "Thenzawla golf course dinna tur atan hian sorkar laipui chuan cheng vbc. 94 a pawm a, heta
ṭang hian cheng vbc. 18 sanction a ni tawh. Tunah hian sum hman phalna Finance department-ah dil mek a ni," a ti.

Tourism Minister chuan, golf course chu a ṭangkaina tur hre lo an awm mai thei tih sawiin, "Infiamnaah chuan pawisa tamna berte zinga mi a ni. Kan siam hunah chuan mi lian leh hausa tak takte an rawn kal ang a, Mizoramah sum leh pai an rawn hmang dawn a ni," a ti a; golf course-ah hian hotel ṭha tak tak din tel a nih tur thu a sawi.

Supply minister ni bawk John Rotluangliana chuan, Food Security Act chu rin aiin a harsat thu sawiin, "A dawng tur thlan chhuah a harsa hle. Hmun ṭhenkhatah chuan bituk aia tam dawng thei an awm laiin, hmun
ṭhenkhatah chuan bituk zat dawng tur pawh an awm lo. Siamṭhat tur a tam hle," a ti.

Supply Minister chuan, Food Security hmang thuai turin sorkar laipuiin nawr ṭhin mah se, tih chak theih a ni lo tih sawiin, "A fel tawh emaw tih hnuahte complaint a awm a, kan siamṭha leh ṭhin. Food Security hi hman a nih hun chuan ration card siam thar hman tur a ni," a ti a; Food Security hman tirah chuan temporary ration card hman phawt a nih tur thu a sawi.