KHAWTHLIR

Champhai & Saiha MJA hruaitu thar

Mizoram Journalist Association (MJA), Champhai district leh Saiha district-te chuan nimin khan kum 2016-18 chhunga office bearer turte an thlang. Champhai MJA-te'n president-ah C Lalhnunpuia, vice president-ah R Lalfakawma leh treasurer-ah Lalnunsanga Fanai te an thlang a ni. Saiha MJA hian president-ah V Pawhla (New Skylink Vision), vice president-ah CZ Hluna (Buannel) leh treasurer-ah Lalnunkima Hnialum (Star Vision)-te an thlang.

Thisen pe

Inter College Youth Adventure Club-te chuan nimin khan Aizawl Civil Hospital-ah blood donation camp an nei a, mipa mipa 97 leh hmeichhia 24-in thisen unit 121 an pe. BCM Hnahthial North pastor bial ṬKP pawhin nimin khan Hnahthial Venglai Kohhran Hall-ah blood donation bamp an nei a, Lunglei Civil Hospital tan mipa 34 leh hmeichhia 12-te'n thisen unit 46 an pe a ni.

Mi thattu dem

Ramhlun South Branch YMA chuan thuchhuah siamin, an veng pa HK Vanlaltlana, Chawngtea Supply department storekeeper, a driver Lalnunzauva'n sum ît vanga a that chu an dem tak zet thu leh, Riasikah MTP-in Lalnunzauva an lo man chu lawmawm an tih thu an tarlang. Lalnunzauva chu a na thei ang bera hrem an phût thu leh, HK Vanlaltlana chhungte sorkarin chhawmdawlna a pek ngei an beisei thu an sawi.

BJP hruaitu

BJP Mizoram Pradesh president Prof. JV Hluna chuan nimin khan Aizawl Press Club-ah thuthar thehdarhtute a kâwm a, kum 2015-18 chhunga BJP Mizoram Pradesh hruaitu turte a puang. BJP hruaitu turte chu - vice president Nirupam Chakma, Chalngura Jahau leh Helena Lalsawmkimi an ni.

Airport tifai

UD&PA department leh Lengpui Branch YMA ṭangkawp chuan nimin khan Lengpui Airport-ah ‘Clean My Airport’ programme an hmang a; Lengpuia YMA member-te bakah high school leh middle school zirlaite'n airport leh a chhehvel tifaiin a hnatlang a ni.

Chaw siamsak

ITI Veng Branch YMA chuan nimin khan Ragiv Gandhi Stadium-a Assam Regiment-a luh tuma a intlar, a bikin thingtlang aṭanga kal leh mahnia chaw ei hman lote tan a thlawnin chaw ei tur an buatsaih a; sipaia intlar mi ṭhahnem takin chaw hi an ei a ni.

Champhai KVK

Scientific Advisory Committee (SAC), KVK, Champhai district chu nimin khan Champhaia IPR conference hall-ah an ṭhukhawm a; KVK hmalaknate thlirhoin, kum 2016-2017 chhung atan annual action leh hmalakna tur chhawp-chhuahte an sawiho.