Medical college tur endik thuai dawn

Health minister Lal Thanzara chuan, State Referral Hospital-a medical college (MIMER) din tum chu Medical Council of India hotute'n an rawn endik thuai dawn tih a sawi.

Lal Thanzara hian nimina 'World Leprosy Eradication Day' a hmanpuinaah MIMER din tum chungchang a sawi a; sorkarin chak taka hma a lak mek thu sawiin, "State Refferal Hospital hi medical college-a siam tum mek niin, tih tur ṭul hmasa ber, khum 250 dah tum mek a ni a, nurse pawh mamawh zat, 40 lakna kalpui a ni," a ti.

Health Minister chuan, State Referral Hospital chu medical college atan a tling tâwk em tih endiktute an lo kal thuai dawn tih sawiin, "An pawm ta lo a nih pawhin Aizawl Civil Hospital aia hmanraw ṭha zawka thuam tum a ni," a ti. Tun hnaiah doctor specialist eng emaw zat chu State Referral Hospital-a dah an nih thu leh, nurse 25 lak belh tuma hmalak mek a nih thu a sawi bawk.

Medical college din tur chung-changah hian Ningani tlai khan Advisory Committee on Medical College member-te Health Minister State Referral Hospital-ah an ṭhukhawm a; hmalak zel dan tur an sawiho.

Health Minister chuan, doctor leh nurse-te inpekna leh hnathawh fakin, an thawhrimnnaah lawm thu a sawi a, "Tunah hian State Referral Hospital hi tihchangtlun zel tum a ni a, a bul ṭan nan doctor leh nurse eng emaw zat chu dah belh tum mek a ni. Medical college hawn thuai a nih theih nan Medical Council of India duh dan tipuitling tura chak taka hmalak mek a ni," a ti.

Medical college din a nih hnua changtlung taka a kal zui zel theih nan sum deh chhuah dan tur leh thawhpui tur (collaboration) zawn a ṭul tur thu meeting-ah hian tarlan a ni. Tuna construction buaipui mektu KMV Project, Hyderabad pawh an hna thawh danah priority basis-a thawk tura vil ni se, an ti.