North East Food Processing Conclave

30th January, 2016

Ministry of Food Processing Industries leh Mizoram sorkar bultumin Indian Chamber of Commerce-te chuan nimin khan Aijal Club-ah 'North East Food Processing Conclave : Mizoram' tih thupui hmangin training an buatsaih a, Agriculture minister R Lalzirliana, Industries minister H Rohluna leh Horticulture minister H Rohluna ten an hmanpui.

Agriculture Minister chuan, Ministry of Food Processing Industries bultuma technology thar leh man tlawm zawk-a thlai thar chhuahte sawngbawl nana hmalak a ni chu lawmawm a tih thu a sawi a, "Tunah hian Industrial Growth Centre, Luangmualah bun a nih tawh a, Food Processing Unit atan hmun 24 lai ruahman a ni. Agriculture department chuan kum 2005 aṭang khan oil palm lamah hma la tawhin, private company-te nen MoU an lo ziak tawh," a ti.

Mizoram chu industry leh ei tur sawngbawlna lamah a hnufual avangin rualawh a nat thu sawiin R Lalzirliana chuan, "Mithiam kan neihte hian ṭhalaite an cho phûr a ngai. Mizoram hian buh leh bâl, thlai leh theite thar ṭha zawkin man tlawm zawka hralh chhuak turin tih theih a ngah a ni," a ti a; Mizoram intodelhna tur leh hlâwkna turin ṭan lak a ngaih thu a sawi.

Industries minister H Rohluna chuan, Mizoram ei leh bara hmasawnna tur atana sûlsutu pawimawh tak pahnih chu industry leh agriculture a nih thu sawiin, "Kan ram leilung leh boruakin a zir avang hian agriculture leh horticulture lamah pawh beiseina a sang a, tuna state dorkarin NLUP hmanga hma a lakna rah chhuah avang pawhin he lam kawnga thawh chhuah chuan rah ṭha tak, hlawk zawk a neih thuai ka beisei," a ti.

Horticulture minister PC Lalthanliana chuan, Mizoram awmna a kilkhâwr deuh avang-in huan thlai hralhnaah harsatna a awm ṭhin tih sawiin, "MOFPI kaltlanga heng harsatna hi sutkian theih a nih ngei ka beisei," a ti a; huan thlai, buh leh bâl leh thei rahte a hlawk chuan lehkhathiam hna la nei lo tam tak tan thawh tur a awm phah dawn thu a sawi.

Training-ah hian state pawn aṭangin mithiam eng emaw zat an lo kal a, thil pawimawh hrang hrang kalkhawmte an zirtir a ni.