Drugs Control Bill Drafting Committee ṭhu

Mizorama ruihhlo khuahkhirhna dan duang tura din Drafting Committee chu nimin khan an chairman R Lalrinawma, Assembly deputy speaker hoin a pisaah a vawi khatna atan an ṭhu khawm a; Mizoramin ruihhloa harsatna a tawh hrang hrangte an sawiho.

Meeting chuan, ruihhlo mana a hremna dan hman lâr ber, Drugs & Cosmetic Act leh ND&PS Act-in a huam loh ruihhlo vanga harsatnate zir chiangtu tur Working Group an din a, chairman atan Health Services-a joint director (Food & Drugs) Lalsawma an ruat. CID (Crime) SP Lallianmawia, Excise & Narcotics deputy commissioner Ngurchungnunga Sailo leh Social Welfare department-a consultant Lalhlupuii Sailo te chu member an ni. Anni hian February 10-a Committee ṭhutkhawm leh huna report hman turin lo zir chiang se, an ti.

Mizoram Drugs Control Bill Drafting Committee-ah hian Health Secretary, Social Welfare Secretary, Excise & Narcotics Secretary, CID DIG, Health department Principal Director, Social Welfare Director, Excise & Narcotics Commissioner, CID (Crime) SP, Forensic Science Laboratory Director leh Food & Drugs-a Joint Director-te member an ni.

Thu dawn danin, tuna Mizorama ruihhlo mana Police, Excise leh Drugs Controller-te'n thubuai an siamsakna ber, Drugs & Cosmetic Act leh ND&PS Act-in a huam chiah loh ruihhlo a awma sawi a ni a; khehpuam tia sawi, pseudoephedrine vanga an man tam tak pawhin Court-ah thiam an chang leh zela sawi a ni. Chuvang chuan, sorkar chuan ruihhlo khuahkhirhna dan thar duang tur a din ta a ni.