KHAWTHLIR

Champhai Nature Conservancy leh Tarmat company-te chuan inremna an siam angin, nimin aṭang khan World Bank Road-ah thing an phun ṭan. Thing­phun hawnna inkhawm tâwi buatsaih a ni a, Champhai additional district & session judge R Vanlalena khuallian a ni. Champhai Nature Conservancy leh World Bank kawng siam hnathawktu Tarmat company-te hian Khankawn leh Mualkawi inkar leh, Zotlang leh New Champhai inkarahte thing ṭiak 1,000 phun turin inremna an siam a ni.

MTP Siaha Branch chuan nimin khan MTP pisaah Siaha District Hospital tan thisen unit 32 an pe a, a petute mipa 24 leh hmeichhia pariat an ni. HBK MMA Gym, Kulikawn pawhin Synod Hospital blood bank-ah nimin khan thisen unit 10 an pe a; Aizawl Civil Hospital blood bank-ah individual donor mi pali an awm bawk.

Salvation Army-a Republic CO Bial SAY chuan Winter Praise 2019 an buatsaiha sum an hmuh Rs. 43,170 chu nimin khan Zemabawka Cancer Hospital-a damlo harsa zualte tan an hlân.

Lunglei SP chuan, May 22, nimin aṭangin APS company-te'n Rualalung-Chawngte inkar kawngpui siam hna an thawh avangin, hna thawh zawh a nih hma chuan lirthei tlân phal a nih loh thu a puang. Lirthei hi chhun dar 1-2 leh tlai dar 5 leh a tûk zing dar 9 inkarah erawh chuan tlan theih a ni ang.

Baktawng Venglai Presbyterian kohhran chuan nimin khan Ser­chhip district-a quarantine facility-a khung hran mekte tan Rs. 10,000 leh chawhmeh chi hrang hrang an pe a, Serchhip bawrhsap Dr Lalzirmawia Chhangte hnenah an hlân. Ser­chhip district-a quarantine facility-ah state páwn 

aṭanga haw khung hran mi 58 an awm mek a; Tourist Lodge, P&E Rest House leh Eklavya Residential School Hostel-ahte dah an ni. 

Mamit SP chuan, Dàmpui khaw chhunga lut National Highway- 44 'A' double lane tura zauh hna PWD-in an thawh mek avangin 407 truck leh a aia lian lirtheite tlan phal a nih loh thu leh, lirthei liante chu kawng hlui lama tlân vek tur a ni tih a puang.