CM puhna thu dik a ni lo - Mizoram Police

Mizoram Police chuan thuchhuah siamin, chief minister Zoramthanga'n MNF MLA-te'n ZPM Legislature Party leader Lalduhoma bàn tura Assembly Speaker an ngenna sût a nih theihna atan hma la turin Mizoram Kohhran Hruaitu Committee (MKHC) a ngen anga thuthang awm chu thu dik a nih loh thu an tarlang.

Police tarlan dan­in, October 1, 2020 khan What­sapp group pakhat 'Progress' tihah member pakhat chuan CM Zoramthanga tihhmingchhiat tumna nia ngaih theih tur a post a ni. A thu post chu, 'CM hian MKHC te hi naktukah tuna Duhoma banna tura buaipui sût tura ngen turin anmahni a inhmuhtir dawn vel ni awm tak a ni. MKHC hian inrawlh an tum pawh a ni lo a, CM hian game tenawm, mipui laka face saving action atan MKHC te hi a hrilh tir anih hmel riau mai,' tih a ni.

Thu post chung­changah hian October 2, 2020 khan Cyber Crime Police Station, Aizawl chuan Chief Minister Office aṭangin complaint an dawng a, an chhui zui nghal.

Police thuchhuah chuan, Progress group-a thu post-tu chu K Vanlalruati (42) d/o P Liankhuma (L), IFS (Rtd.), Tlangnuam Vengthar, Aizawl a nih thu tarlangin, "K Vanlalruati hian ni 18.3.2020 khan Whatsapp-ah 'Progress' tih group a siam a. Ni 1.10.2020 zan dar 8:32 khan a chunga tarlan statement khi Progress-ah chuan a post a ni. A thu post hi ama iráwm chhuak liau liau niin, an ṭhian ho titina aṭanga a ngaihtuah chhuah a ni," a ti a; thu belhchian dâwl leh innghahna fumfê nei a ni lo a, a zêldin thu niin a tarlang.

K Vanlalruati thu post chu group member zinga miin screenshot-in hmun dangah a thehdarh nia tarlangin Police-te chuan, "Hetianga a thu post a darh ta vak mai hi pawi a tiin, social media lamah a darh vak ang tih a rin bik loh thu a sawi a ni," an ti.