66TH WILDLIFE WEEK 2020 THUCHAH
Wildlife Week vawi 66-na (1-7.10.2020) kan lo thleng leh ta a, Mizoram mipuite chibai kan buk a che u.
India ram ropui tak mai hi ramsa leh nungcha hi hrang hrangte tualchaina hmun a lo ni tawh thin a. Chungte chuan kan ecological balance min vawnhim sakin ram ropui tak kan ni reng thin a. Mihring ngaihsamna leh duhamnate avangin ramsa hlu tak tak kan neihte an boralin an rem chak hle a ni. Siamtu-in khawvelah hian mihringte hi Ramngaw leh nungchate nena cheng ho tura a duan kan ni a. Tun maiah kan hre pawh pha lo anih pawhin inmamawh tawn leh inchawm tawn tura siamtu duan kan ni tih hi i hre thar leh ang u. Kan ramngaw leh nungchate hi rem fai vek mai sela mihring hi kan dam khawchhuak bik lovang.
India hnampa Mahatma Gandhi pawhin, “Leilung hian mi zawng zawng mamawh min phuhruk zo a ni, mi tlemte duhamna erawh a chawm zo lo.” a ti a ni.
Hei hi hriain kan ram hruaitu hmasate khan kum 1952 daih tawhah khan hetiang lama inzirtir thar lehna chawlhkar (Wildlife Week) hi kumtin hman nise tiin an lo rel tawh a. Kum 1954 atangin a takin kan lo hmang chho tawh a ni. Kum dangah chuan hemi hunah hian mipui leh zirlaiten ramngaw leh nungchate humhalha, kan chhehvel boruak, tui, leilung, ramngaw leh nungchate thlenga dimdawi a tul zia inzirtirna hun atan hman a ni thin a, kuminah erawh chuan COVID-19 hripui lengin min tlakbuak avangin duh angin hma a lak theih lova, pawi kan ti hle a ni.`
Vawinah hian sorkar leh pawl anga hmalak remlo pawh nise, mitin hian tih theih kan nei vek a. Ngaihtuahna senga, midang tlinlohnate enghelh lova, mahni ngei nungcha humhalh kawnga ke lo pen chhuak turin kan sawm che u a ni. Kan ram zimte hi kan neih chhun a ni a, hei lo chu ram dang kan nei lo. Kan mamawh tawk chu kan ram hian min pe thei a, mi duham leh misualte avanga kan rama nungcha tlem ta lutuk hi kan ngaih mawh a hun tawh tak zet a ni.
Wildlife Week 2020 atang hian kan rama nungchate zalen taka an khawsak ve theihnan Zoram mipuite rilru thar leh ngaihtuahna thar senga a humhalhtu ni theuh turin kan sawm a che u.
ENVIRONMENT, FORESTS & CLIMATE CHANGE DEPARTMENT, GOV’T OF MZORAM