AMC-in ram ruakah chhiah lak a tum Kum khat chhungin free wifi siam an rel

29th January, 2016

Aizawl Municipal Council (AMC) Board of Councillor (BoC) nimina
ṭhukhawm chuan, ram ruakah chhiah lâk dan tura ruahmanna an pawm a; kum khat chhunga Aizawl khawpui chhung hmun
ṭhenkhata a thlawna wifi hman theih (free wifi) tur siam an rel.

AMC Board of Councillor meeting hian, Mizo ṭhalaite information technology lama hma an sawn zel theihna atan leh khawsak harsa zawkte pawhin IT an hman ṭangkai theihna atan kum khat chhunga Aizawl khawpui chhung hmun ṭhenkhata free wifi siam tura rawtna awm chu an pawm a ni.

Vanglaini palai zawhna chhangin AMC mayor PC Lalhmingthanga chuan, "Service provider lamah chuan min rawn dàwr reng tawh a; a hmun tur pawh thlan deuh tawh chu kan nei a, mahse, la ngaihtuahho leh a ni ang. Free wifi ruahmannaah chuan khawpui danga an tih ang vela chak kan tum a, movie-te download zung zung theihna ang chu tih chi a ni lo," a ti.

AMC BoC meeting hian Fixation of Multiplicative factor of Property Tax and Utilization of Property Tax pawh an pawm. Hei hi AMC-in Property Tax hnuaia ram ruaka chhiah lâk a tum, state sorkarin a phalsak tak loh vanga ruahmanna thar a ni. Ruahmanna tharah chuan, ram ruak aṭanga chhiah lâk tur chu eng emaw zata tihhniam a ni a, mahse ram ruaka chhiah la turin sorkarah phalna lak leh a ngai dawn.

Meeting-ah hian AMC hnuaia hma-sawnna hnathawh thliar hranna, 'Work policy and purchase police under AMC' tih chu pawm a ni. Thu dawn danin, AMC hnuaia auditor-te'n development work thawh dan an sawisel ṭhin avangin policy thar hi duan a ni a; policy thar hnuaiah hian minor work leh major work ṭhen niin, major work chu cheng nuai 25 chin a ni a, minor work chu cheng nuai 25 hnuai lam a ni ang.

Adoption of Acts, Rules, Regulations and Activities of Aizawl Municipal Council pawh pawm a nih a; meeting-ah hian Municipal Account Committee tur thlan nghal a ni.

Municipal Account Committee-ah hian convener atan Rosiamngheta (MPCC) leh secretary atan H Vanlalruata (MPCC) ruat an ni a; member-te chu - K Romawia (MNF), R Lalbiakthanga (MNF) leh R Zomuanpuii (INC) te an ni.