Entry Tax la turin Mizoram inpeih Hman hun tur hriat theih a la ni lo

Online shopping leh mimal, company leh department-te'n state páwn aṭanga bungrua an lak luh aṭanga chhiah lakna tur, The Mizoram Entry Tax atana hman tur dan (rules) peihfel a ni tawh a; mahse dan thar hi hman a nih hun tur hriat a la ni lo.

Vanglaini palai zawhna chhangin Taxation department hotute chuan, The Mizoram Entry Tax hmanga chhiah la tur hian a dan leh hrai lamah chuan engkim peihfel a nih tawh thu an sawi a, "A hman hun turah thutlukna siam a la ni lo. Rilru chuan sorkar kum thar, April 1, 2016 aṭanga hman ṭan ṭha tihna a awm a, mahse minister hoin a hman hun turah thutlukna siam a ni ang," an ti.

Taxation department hotute chuan, online shopping aṭanga chhiah lâk a harsat an rin loh thu sawiin, "Company-te'n depart-ment-ah pawisa an rawn chhûng lut ang a, an bungraw rawn thawn aṭangin kan cut zel ang. An pawisa dah a zawh hunah an rawn dah belh leh mai ṭhin dawn a ni," a ti a; online shopping aṭanga chhiah la tur hian harsatna an neih an rin loh thu an sawi.

Pawisa pek zat leh bungraw thawn inmil lo awm thei chung-changah Taxation hotute chuan, "Online hmangin engkim an kalpui a, kan tan endik a harsa lo ang. Airport-ahte pawh mi leh sa kan nei vek a ni," an ti.

Taxation department hotute sawi danin, mimal, department leh company-te'n state páwnah bungraw tam tak an lei ṭhin a, an leina state-ah chiah an cháwi a, Mizoramah chhiah an âwl thung. The Mizoram Entry Tax hi kalpui a nih chuan, Mizoramah pawh state páwn aṭanga zawrh tur ni lo bungraw la lut pawhin chhiah an chawi tawh dawn a ni.

State páwn aṭanga bungraw la lut turte chuan Mizorama Taxation department-ah phalna lain, chhiah an chawi ang. Phalna an lak zat aia tam lak luh an tum a, man an nih chuan value added tax (VAT) hnuaiah hrem tur a ni. Phalna nei, phalna an neih zat ang bungraw la lutte tan chuan Vairengtea Taxation check gate-ah pawisa chawi a ngai lo.

Entry Tax hnuaiah bungruate chu category hrang hrang 45-ah ṭhen a ni a; category pasarihah chhiah 2% lak a ni dawn a, category pakhatah 3% lak tur niin, a bak zawngah chuan 4% lak a ni ang. He dan hnuaia chhiah lak aṭangin Taxation department chuan kum khatah cheng nuai 300 vel hmuh theih an inbeisei.

Entry Tax lakna tur ṭhenkhatte chu - agriculture machinery, chemical, coal, hospital equipment, diesel, petrol, computer, balu, lung, leirawhchan, tile, puanthân, motor vehicle, furniture, electrical goods, photographic camera, pipe chi hrang hrang, limestone, generator set, industrial cable, damdawi, railway track hmanrua leh tele-comunication hmanruate a ni.