KHAWTHLIR

Thisen pe

Hrangbana College chuan nimin khan an college-ah blood donation camp an huaihawt a, Aizawl Civil Hospital tan thisen unit 124 pein, a petute mipa 98 leh hmeichhia 26 an ni.

Kolasib ATMA

Agricultural Technology Management Agency (ATMA) Kolasib District Governing Board chu Nilaini khan an chairman H Lalengmawia, Kolasib DC hoin a pisaah an ṭhukhawm. Meeting-ah hian kum 2015-16 atana hmalakna tur leh block technology team pahnihte hna thawh tur an pharhte sawiho a nih hnuah pawm a ni.

Training khâr

January 27, 2016 khan Mizorama Fisheries officer leh staff-te leh sangha chi siam chhuahna farm-a thawktute tana buatsaih Training on Hatchery Management for Fish Seed Production of Golden & Chocolate Mahseer chu State Guest House-ah khâr a ni a; Fisheries minister Dr BD Chakma-in a hmanpui.

Science workshop

Directorate of Science & Technology bultumin nimin khan Berawtlanga Mizoram Science Centre-ah 'Basic Sciences' tih thupui zirhona neih a ni a, Planning secretary Dr C Vanlalramsanga'n a hmanpui. Workshop hi zirlaite'n awlsam leh nuam ti zawka science an zir theih nan science zirtirtute tana buatsaih a ni. 

College tur tlawh

Higher & Technical Education minister R Romawia chuan nimin khan Lunglei Pukpuia engineering college sakna tur hmun a tlawh a, college chu a rang thei ang bera sak a nih tur thu a sawi. Minister hi parliamentary secretary (HTE) H Zothangliana'n a ṭawiawm a ni.

Loneitute zirtir

Council of Scientific and Industrial Research (CSIR) Institute of Himalayan Bioresource Technology, Palampur-a scientist-te chuan nimin khan Champhaia loneitu thlan bikte hnenah apple chin dan an zirtir.