Sorkarin economic policy thar a duang: MPCC

Mizoram Pradesh Congress Committee (MPCC) Media department chuan nimin khan Aizawl Press Club-ah thuthar thehdarhtute an kawm a; Mizoram sorkarin economic policy thar a duan mek thu an puang.

MPCC Media department chairman James Thanghmingmawia chuan, "NLUP dawngtute zinga hlawhtlinna hmu an awm chhoh tâkah chuan a hlawhtlingte an tlat tlata tlattir sorkarin dikin a hre lo a. An siam chhuah leh thar chhuahte suma an chantir loh chuan hlawh-tlinna awmze nei lo a nih dawn avangin, an hralh theihna atan economic policy thar, New Economic Development Programme (The Way Forwrard) tia vuah chhin duan mek a ni," a ti.

James Thanghmingmawia sawi danin, economic policy thar kalpui tur hian economic development process leh planning a ṭul anga her rem a ngai dawn. Agriculture leh a kaihhnawih thilte chu mirethei eizawnna ringawta dah loin, tunlai thiam-na hmangin agri-business-ah dah lutin, chumi kawng zawh tur chuan ṭhalai lehkhathiamte zirtir a ngai dawn. Thlai leh thei rah thlan bikah contract farming system kalpui tum a ni bawk.

Mizoram sorkar chu engkima inrawlh a tum lo a, kut-hnathawktute’n harsatna an tawha ṭanpuitu nih bakah, thar chhuah leh siam chhuah awlsam zawka hralh a nih theihna tur kawng kawhhmuh leh siamsak chu policy tharin a tum ber a ni.

Congress kaihhruai Mizoram sorkarin Zoram mipui tan nasa takin hna a thawk mek zel nia sawiin MPCC Media Chairman chuan, "Sum harsatna awm bawk mah se, mipui tan a ṭul angin hna a thawk reng a. Tun dinhmunah sorkar sum a ṭha chho mek zel a, hmasawnna hna thawk chhunzawm zel turin sorkar pawh a inbuatsaih mek a ni," a ti.

James Thanghmingmawia chuan, Finance department-in state sum dinhmun siamṭhat hna a thawhin awmzia a nei tih sawiin, "Tun hmaa K-Deposit-a cheng vbc. 1,000 chuang dah ṭhin kha, December 2015-ah chuan cheng vbc. 729.45 chauh a ni tawh," a ti a; K-Deposit-a sum awm chu kuminah chuan nikum December aiin a hniam rin a nih thu a sawi.