Ramrî-in min ṭhen tur a ni lo: Thanzara

Chin-Lushai Conference–cum–ZoRO Convention champha 124-na chu nimin khan Vanapa Hall-ah hman a ni a; khuallian, minister Lal Thanzara chuan Zofate chu ramri-in a ṭhen hrang tur a nih loh thu a sawi.

Lal Thanzara chuan, Zofate insuihkhawmna tura ZoRO leh political party hrang hrangte thawhhona chu lawmawm a tih thu a sawi a, "Zofate hi khawi rama piang leh sei lian pawh ni ila, Zo hnahthlak kan nihna a bo chuang lo. Kan inunauna hi international boundary emaw, inter-state boundary emaw hian min daidang thiang lo,” a ti.

Chi bing leh ṭawng hrang zawnga inlâk hran chu Zo hnahthlak tei têtna a ni tih hriat a pawimawh thu sawiin Lal Thanzara chuan, "Inpumkhatna rilru púa nunho thiam zel turin Zo hnahthlak zawng zawngte i ṭang tlang ang u," a ti a; Pathianin hun a tihah chuan Zofate chu rorelna pakhat hnuaiah hruai khawm an la ni ngei ang tih ring turin Mizo mipuite a sáwm a ni.

Inkhawmah hian political party leh NGO hrang hrang aiawhte'n thu an sawi a, ZoRO hruaitu thi tawhte sûnna hun an hmangbawk.