Kum 2015-ah sikserh vangin mi 17 an thi

National Vector Born Diseases Control Programme (NVBDCP) huaihawtin nimin khan Tourist Lodge, Chaltlangah Intensified malaria Control Programme (IMCP)-III first quarter review meeting neih a ni. Kum 2015 chhungin sikserh vangin mi 17 an thia chhinchhiah a nih thu an tarlang.

Review meeting hi Health Services director Dr Rohmingthanga Ralte-in a kaihruai a; Health principal director Dr K Ropari'n thu sawiin, Health department-a thawkte chu an hmazâwn ṭheuha hna awmte taima leh rinawm taka thawk zel turin a fuih.

Dr K Ropari chuan, sikserh tibo turin mipuite'n sorkar thu an zawm
ṭhat a pawimawh thu sawiin, "Kan in leh a vêl vawn fai ṭhat te, thosi pian theihna chi reng reng awmtir lohte leh zanah mut hmunah thosi lên zar
ṭhat te, in leh a vêl DDT ṭha taka kan kahtirte hian nasa takin sorkar kan pui a ni," a ti.

Sikserh vanga thihna tam ber chu inentir tlai vang a nih fo thu sawiin, K Ropari chuan, mithiamte pan thuai a ṭul thu a sawi. Hawnna inkhawm-ah hian National Health Mission-a mission director Dr K Lalbiakzuala pawhin thu a sawi bawk.

Health Services joint director (Malaria) Dr C Zarzoliana'n report a pek danin, kum 2015 chhung khan Mizoramah thisen exam zat chu mi 3,02,508 an ni a, chu'ng zinga mi 22,578 chu malaria PF leh mi 3,771 chu malaria PV an ni. Kum 2015 chhunga sikserh vanga thi an chhin-chhiah zat chu mi 17 an ni.

Meeting-ah hian October-December 2015 chhunga Mizoram district hrang hrang dinhmun leh an hnathawh dante zirho a ni a; vawiinah chhunzawm a ni ang.