Sorkar pisa ṭan hun tihma turin CM a ngen

MZP office bearer-te chuan Nilaini tlai khan chief minister Lal Thanhawla chu a banglaah an hmu a; sorkar pisa ṭan hun sawn hma, advertisement chhuah loa sorkara thawk tur lak leh Mizoram leh Assam inrinaa buaina awm ṭhin chungchangte an sawipui.

MZP hruaitute chuan, Mizoram leh Assam ramri-ah state pahnihin an pawm tlân theih tur ramri felfai a awm loh avangin tun thlengin ram inchuhin buaina a la awm tih an sawi a; ramri buai chu sorkar laipui lamin an chingfel mai dawna a lan loh avangin, ram chin humhalh nan Boundary Development Wing/Cell siam a nih theih nana hma la turin CM an ngen a ni.

MZP-te chuan, kum 2015-16 school session aṭanga Mizorama sikulah ṭan hun sawn hma a ni chu Mizo hnamin a ṭhatpui hle dawna an ngaih thu sawiin, sikul ṭan hun chu tidanglam tawh loa kalpui zel turin CM an ngen.

Mizoram sorkar pisa ṭan hun pawh sawn hma a nih theih nan MZP hruaitute chuan CM an ngen a; sorkar pisa ṭan hma a nih chuan, ni êng hman
ṭangkai hun chhung a rei ang a, chu chu Mizoramin hma a sawn phah tura an ngaih thu an hrilh.

Chief Minister chuan MZP hruaitute thu thlente chu ṭha a tih thu leh, a ṭul anga bawhzui a tum thu a lo hrilh niin MZP chuan an tarlang.