Lalhimpuia'n Ratan Tata a kâwm

Parliamentary secretary (School Education) Joseph Lalhimpuia chuan Mumbai-a TATA Trusts hmalakna, Connected Learning Initiatives (CLIx) hawnnaah TATA Trusts chairman Ratan Tata a kawm a; Mizoramin zirlaite hian infiamna hmunhma ṭha a neih theih nan hmalakpui turin a ngen.

Joseph Lalhimpuia chuan, Ratan Tata chu Mizorama zirna dinhmun hrilhin, India ram pumah ziak leh chhiar tam lamah a ṭha berte zinga mi a nih thu a sawi. CLIx hnuaiah hmasawnna nasa tak a thlen a beisei thu a sawi rualin, Mizorama zirna inte'n sport infrastructure an nei ṭhat tâwk loh avangin, zirlaite'n infiamna hmunhma ṭha an neih theih dan tur ngaihtuahpui turin a ngen a ni.

Ratan Tata pawhin Mizo naupangte infiamna lama hma an sawn nasatzia a hriat thu a sawi a; a theih chin chinah puih an inhuam thu a lo hrilh. Joseph Lalhimpuia chuan, TATA Trusts-in SSA hnuaia sports academy 60 an buatsaih turah a hawnna programme-a tel turin Ratan Tata chu a sáwm nghal a ni.