MJA-te'n kumthar atana Inhlan tharna hun hmang

MJA general headquarters chuan nimin khan Aizawl Press Club-ah kumthar atana inhlan tharna hun an hmang a, thingpui inho a, member-te an tel ṭha hle.

Inhlan tharna hun hi MJA treasurer R Lal-hmangaihzuala'n a kaihruai a; MJA president Vanlalrema Vantawl-in thuchah sawiin, rilru thar nena kum thar hun hmang turin member-te a chah a, "Hmasawn zel turin ṭan kan lak a ngai a, ṭanrualna leh pawl hmangaihna nena kan thawh chuan kan zavaiin a rah kan tél thei dawn a ni,” a ti.

MJA President chuan, MJA member-te chu upa zawkte zah kawngah ṭan la lehzual turin a ngen a, senior-te pawh MJA thil tihnaah telpui ṭhin tur leh thurâwn pe ṭhin turin a ngen a, "Lungrual taka kan thawh loh chuan kan pawl hian a tuar dawn a, ṭha zawka thawhho zel kan zir a ṭul a ni,” tiin, member-te chu pawl siamṭhat kawngah thurâwn pe ṭhin turin a sawm a ni.

MJA vice president Zonunsanga Khiangte-in MJA Constitution (Amendment 2015) leh MJA Welfare Rules 2002 (Amendment 2015) bu thar a tlangzarh.

Inkhawmah hian MJA member-ten pawl kal zel dan tura an duh dante leh chanchinbu mite tih leh tih loh atana ṭhate zau takin an sawiho a ni.