HIV/AIDS do nan MLA-ten an fund aṭangin Rs. 1,00,000 pe dawn hnai

Mizoram MLA-te'n HIV/AIDS dona atan Rs. 1,00,000 ṭheuh thawh an lo intiam tawh angin, Rs. 1,00,000 hi an pe chho dawn mek a; Treasury lamin MSACS-ah an thun thuai beisei a ni.

Mizoram State AIDS Control Society kaihhruaiin July 7, 2015 khan Assem-bly session neih laiin Assembly Recess Room-ah Legislative Forum on AIDS meeting neih a ni a, MLA-te tan HIV/AIDS chanchin zirna buatsaih niin, session-a tel MLA-te an tel kim. He meeting-ah hian MLA-te chuan HIV/AIDS dona atan MLA fund aṭangin Rs. 1,00,000 ṭheuh thawh an tiam a ni.

Legislative Forum on HIV/AIDS hi state tinah din tura tih a ni a, Mizoramah chuan July 27, 2005-ah din a ni. July 7, 2015-a MSACS-in HIV/AIDS awareness a neihpui hnuah, Legislative Forum on HIV/AIDS chu August 3, 2015-ah an din thar leh a; chairman chu Health minister Lal Thanzara niin, secretary-ah Dr K Beichhua an ruat an ni.

MSACS hotute hnen aṭanga thu dawn danin, MLA fund aṭanga Rs. 1,00,000 ṭheuh pek tur hi Planning lamin budget
aṭangin an la hrang a, chu chu Treasury-ah a awm tawh a, token number-te pawh a chiang tawh.

MSACS hotute ngen-na angin Health Minister chuan nimin khan sum lama thuneitute biain, sum chu pe chhuak (MSACS account-a dah) thuai turin a ngen a ni.

Legislative Forum on AIDS hi nimin khan Health Minister pisaah an ṭhukhawm a, member-te leh MSACS hotute an tel. Meeting chuan, MLA tinin an MLA fund aṭanga Rs. 1,00,000 ṭheuh an pek aṭangin taksaa HIV hrik pâi zat enna khawl, CD4 machine lei thuai ni se, an ti.

HIV hrik paite'n Mizoram Health Care Scheme leh RSBY-a inenkawlna senso an bill ve theih nan hmalak an rel a; HIV hrik paite'n damdawi-ina investigation charge an chawi ṭhin pawh ngaihhnathiam an nih theihna turin hmalak dan dap ni se, an ti bawk.

HIV hrik paite'n enkawlna an dawnna atana pawimawh CD4 chhiarna khawl lei bakah, MLA-te'n an bial ṭheuha HIV/AIDS darh tur venna atan condom leh inchiuna hmanrua bakah, mipat hmeichhiatna aṭanga natna inkaichhawn theih (STI) tihdamna damdawi sem dan ngaihtuah ni se, tiin an rel.

A mamawhtute tana thisen pekna (blood donation) lama hmalak atan ruahmanna an siam a; Mizoram MP pahnihte pawh an MP fund aṭang-in Rs. 5,00,000 ve ve thawh tura ngen ni se, an ti bawk.

Dr K Beichhua sawi danin, HIV hrik pâi hmuhchhuah zinga 75% aia tam chu mipat hmeichhiatna aṭanga kai an nih avangin MLA-te'n an bial ṭheuhah HIV/AIDS darh zel tur vên nan nasa takin ṭan la se, condom hmang tura inzirtir ni se, an ti a; thingtlang lamah condom hman tur a awm reng loh avangin MLA tinin Rs. 1,00,000 an thawh khawm aṭangin condom lei nan Rs. 5,00,000 hman ni se, an ti. Condom-te chu MLA-te'n an bial lama an sem darh turin an rel a ni.

Nimina meeting hian Legislative Forum on HIV/AIDS member tur mi 12 an ruat a; chungte chu - TT Zothansanga, S Lalding-liana, Lalrobiaka, K Lalrinthanga, K Sangṭhuama, T Sangkunga, Lalrinawma, John Siamkunga, Lalthanliana, Nihar Kanti Chakma, H Zothangliana leh Vanlalawmpuii Chawngthu te an ni.