Mumbai-a CLIx hawnnaah Joseph Lalhimpuia a tel

Parliamentary secretary (School Education) Joseph Lalhimpuia chu nimin khan Mumbai-a Connected Learning Initiative (CLIx) hawnna inkhawmah chief minister Lal Thanhawla aiawhin a tel.

CLIx programme hi India ram state pali - Mizoram, Chhattisgarh, Rajasthan leh Telangana-ahte hman tur a ni a; heng state palia Chief Minister-te chu a hawnna inkhawma tel tura sàwm an ni.

CLIx hi high school zirlaite'n Mathematics, English leh Science subject-te ṭha leh rintlak zawka an zir theih nana ruahman a ni a; chuta tan chuan TISS leh MIT-te chuan Mizoram sorkar leh Mizoram University-te nen inremna thuthlung an lo ziak tawh a ni.

Mizoramah chuan CLIx hi a bul ṭan nan high school 30-ah kalpui phawt a ni dawn a; kum hnih chhungin sorkar high school 200-ah kalpui hman tum a ni.