Kan fimkhura sorkar thu kan zawm ṭhat chuan Hripui lakah kan invêng thei ang - Health Minister

Health & Family Welfare minister Dr R Lalthangliana chuan, Mizoram mipui an fimkhur a, sorkar ruahmanna an zawm ṭhat chuan hripui darh zel tur lakah Mizoram chu a invên theih a rin thu a sawi.

Health Minister hian nimin khan thuchah tichhuakin, tun hnaiah Covid-19 vei hmuh chhuah loh níte a awm tawh thu a sawi a, "Tun hnaia positive thar kan neih zinga a tam zawk chu Mizoram páwn aṭanga rawn lut, quarantine lai an ni ta zel a, tualchhunga hmuh zat chu uihûm  lek a ni ta. He hri lakah hian kan fimkhur a, ṭang tlánga sorkar ruahmanna kan zawm ṭhat chuan hri darh zêl tur lakah Mizoram hi kan inveng thei tih a lang a ni," a ti.

Dr R Lalthangliana chuan, September tìr lamah ni khat thil thuah Covid-19 vei hmuh chhuah zat a pung nasa tih sawiin, "Kha vang khan kan hotute'n uluk taka ngaihtuahna séngin Aizawl khawpuiah inkhàrkhip ni 10 chhung kan nei a ni. Mipuite'n kan ṭhat tlànna tur a ni tih hriaa dawhthei taka ruahmanna kan zawm avang khán a hlawhtlinna rah kan hmu niin a lang," a ti a; partial lockdown chhungin contact tracing leh swab sample lak hna thawh a nih thu a sawi.

ZMC laboratory-ah tlaivár deuh thawin swab sample endik hna an thawk tih sawiin Minister chuan, "Inkhàrkhip chhung khan sample 15,000 vel lâk a ni a, sample 10,589 test niin, positive hmuh zat 141 a ni. Sample lak a tam tâk êm avangin test result tihchhuah kawngah duh angin a chak thei lo a, dawhthei taka an nghah avangin result nghaktute chungah lawmthu ka sawi a ni," a ti.

Dr R Lalthangliana chuan, ZMC laboratory-a thawkte'n theihtawp an chhuah avangin backlog a awm tawh lo tih sawiin, "Ni khat thil thuah sample dawn khawmte kan test zo thei ta zel a, a lawmawm tak zet. Inkharkhip khân a tum ber chu contact tracing zawhfel a, sample lak ngai tihfel a, inkai chhàwnna chhut chah a ni," a ti a; community spread thleng lo tura theihtawp chhuahtu zawng zawng thawhrimna rah an seng thu a sawi.

Mizoram dinhmun a ziaawm deuha a lan avangin inthlahdah phah a hlauhawm thu sawiin Minister chuan, "Fimkhur takin awm chhunzawm zel ila, Covid-19 hi a nihphung zir chian mek zel a ni. A tìra tuar nasa, a bikin Europe khawmualpui chuan dinhmun ziaawm an pan emaw an intih mek laiin, tun hnaiah hri kai an pung thar leh ta hluai mai a, a thawh hnihna an tawng chho a ni," a ti.

Health Minister chuan, hripuiin Mizoram a luhchilh tirhin swab endikna tur laboratory a awm loh avangin phaiah swab sample thawn ṭhin a nih thu sawiin, "Kan ram chhungah ngei test theih dan kan dap a, Referral Hospital building-a TB Laboratory BSL-3 a lo awm remchang hlauh a, hmanhmawh taka cheibáwlin hman a ni," a ti a; laboratory hmang turin central-a thuneitute dil hmasak a nih thu a sawi.

Dr R Lalthangliana chuan, ZMC-ah Viral Research Diagnostic Lab (VRDL) din a ni dawn hnai nia sawiin, "Hei hi ICMR-in medical college-a awm tura a tih pawimawh tak zinga mi a ni. Kumin March thla khan ICMR hnenah VRDL din theih a nih tawh thu kan thlen a, an muangchang deuha kan hriat avangin kei pawhin ICMR hotute ka bia. VRDL kan neih chuan viral load natna hrang hrang phaia thawn ngai loin kan ti thei vek dawn a ni," a ti.

Health Minister chuan, Mizoram páwn aṭanga rawn lut, home quarantine-a awm tlang nghalte zawm tur inkaihhruaina siamṭhat mek a ni a, rei lo têah hman ṭan a nih tur thu sawiin, "Kan Chief Minister kaihhruaina hnuaiah kan inṭawiawm ṭha hlein kan hria a, rah ṭha chhuahin, Zo fate kan hming a thang mawi hle niin a lang," a ti a; Mizoramin hripui a do danin hnam dang beng a verh hle niin a sawi.