KHAWTHLIR

Mamit MJA

MJA, Mamit district chuan IPRO JH Lalparmawii kaihhruaiin kum 2016-18 chhunga an hruaitu tur an thlang thar a; president-ah Lal-hlupuia (Zolamtluang), vice president-ah PC Lalthanzuala (Lentupui) leh treasurer-ah H Lalramliana (Mamit Times)-te an thlang.

CM relief fund

Chief Minister's Relief Fund-ah YMA sub-headquarters, Serchhip-in Rs. 5,000 leh Serchhip Industrial Co-operative Society Ltd.-in Rs. 5,000 an chhung lut.

Stadium sak vil

Kolasib Venglai khelmuala stadium puitling tur sak mek vil tura din, Monotoring Committee chu nimin khan Kolasib DC H Lalengmawia hoin a pisaah an ṭhukhawm a, hna hrang hrang thawh dante an thlirho.

PIC nei dawn

Press Information Bureau (PIB) bultumin vawiin aṭanga Inrinni thleng hian Khawlailung, Mualcheng leh Piler khuaahte sorkar laipuiin thingtlang mite tana hmasawnna tur programme hrang hrang a neihte mipui hnena hrilhhriatna hun, public information campaign (PIC) neih a ni dawn.

CM zin dawn

Chief minister Lal Thanhawla chuan vawiin hian Aizawl chhuahsanin Kerala khawpui, Thiruvananthapuram a pan dawn. Chief Minister hi Diocese of Madhya Kerala, Church of South India-in January 31, 2016-a Diocesan Annual Convention an neih turah khualzahawm atan an sawm angin a tel dawn a ni.

LIKBK thalai pawl

Lairam Isua Krista Baptist Kohhran (LIKBK) ṭhalai pawl unit hrang hrangte chuan, nimin khan LIKBK ṭhalai pawl din champha vawi 16-na an hmang. LIKBK ṭha--
lai pawl din champha pual hian an awmna huam chhungah vantlang hna thawkin khawtlang thenfai hnatlang an nei hlawm a; ruai nena lawm an awm nual bawk.

Champhaiah ram

tikangtu hremna tur chungchang sawiho

Champhai District Level Fire Prevention Committee chu nimin khan an chairman, DC Vanlalngaihsaka hoin I&PR conference hall-ah ram tikang hremna chungchang leh zau zawka ram tikang lo tura inhrilh-hriat theih dan tur ngaihtuah-in an ṭhukhawm.Champhai DC chuan ram kang laka inven kawngah hian NGO-te leh VC-te nen thawhona ṭha pawimawh thu a sawi.