E&F-in hmunphiah hralh dan a sawifiah

28th January, 2016

Environment & Forest department chuan thuchhuah siamin, Mizoram Forest Act, 1955-in Minor Forest Produce a tih zingah hmunphiah a tel tih a tarlang a, "Tunah hian reserved forest leh government land/forest-a hmunphiah tualṭo, Forest Division ṭhenkhata mite chu revenue tam zawk hmuh theih nan quotation koin royalty rate kg. khatah Rs. 7 aia hniam loa chháng sang berte hnenah tender pek a ni," a ti.

E&F department chhinchhiah danin, hmunphiah tam vak lohna leh quotation chhángtu awm lohna Forest Division-ahte erawh chuan a duh apiang hnenah hmunphiah tualṭo lâk phalna permit pek theih a ni a, royalty kg. khatah Rs. 7 chawi a ngai thung. NLUP leh mimal huana chìn hmunphiahte chu E&F-in a tender ve lo a, mimal hmunphiahte chu a neituin royalty chawi loin lak theih a ni a, an duhna hmun apiangah an hralh thei.

State páwna thawn chhuah dawnah administrative charge kg. khatah Re. 1 chawiin transit pass (TP) lak a ngai a; mimal chìn hmunphiah E&F department-in a tender nia sawi chu thu dik lo niin an tarlang.

NLUP hnuaia chíngtute chuan Soil & Water Conservation department aṭangin thlan an nihna leh ram zau zawng, hmunphiah neih zat E&F-ah an thehluh a ngai.

Forest Right Act, 2006 Section 3-na hnuaiah hmunphiah tualṭo (minor forest produce) chu royalty chawi loa lak phalsak theih dan (right pek theih dan) a awm. Chu-tiang ‘right’ neih diltu chu ramngaw chhunga cheng tribal emaw, tribal ni lo, chhuan thum (kum 75) kal ta aṭanga tun thlenga ramngaw huam chhunga cheng chhungkua (forest dweller) leh intunnun leh eizawn nana ram-ngawa innghat nih a ngai a ni.

Chanchinbu ṭhenkhatah, hmunphiah dan ang thlapa hralhte Lailapur Forest checkgate-ah dan a ni ṭhin tih leh, Kolasib Division chhunga hmunphiah mahal system-a kalpui avangin mimal hmunphiah neitute’n harsatna an tâwk anga tarlan a nih chungchangah E&F department chuan, "January 24, 2016 khan hmunphiah trip khat transit pass tel loa kal chu Lailapur Forest checkgate-ah an lo tiding a, a tukah Bilkhawthlir RO hnen TP an lak hnuah chhuah leh nghal a ni," an ti.