Chhiah chungchang sawihona buatsaih

Land Revenue & Sesettlement (LRS) department-in chhiah an chhût dan leh lak dan chungchanga mipuiin hriatthiam loh an neihte mipuite hnena hrilh chhawn leh puanzar a nih theih nan, nimin khan Kolasib DC H Lalengmawia chuan DC conference hall-ah tlawmngai pawlte thil pawimawh a sawipui.

Kolasib DC chuan, ram leh in chhiah chhût leh lâk danah mipui lamin an hriatthiam loh te, an hriat fuh lohte leh hrilhfiah ngaite tihchian a nih theih nan meeting koh a nih thu a sawi a; chhiah lak dan an hrilhfiahnate chu mipui hnenah a zau thei ang bera hrilh chhawng turin kalkhawmte a ngen.

H Lalengmawia chuan, chhiah reng rengin mipuiah nghawng a nei tih sawiin, "Chhiah pek hi mipuiin kan bat, kan tih ngei ngei tur thil a ni. Zoram chhiahte phei hi chu Mizo hnam kalphunga bet thil niin a lang a, hei hi chu chhungkaw tinte'n kan pe ngei tur a ni," a ti .

Assistant settlement officer H Lalramliana chuan, sorkar dan neih sa pangngai hnuaia chhiah chhût dan leh a lâk dana ruahmanna an siamte a sawifiah a; khawtlang hruaitute'n hriatthiam loh an neih leh hriat duh an neihte a hrilhfiah nghal bawk.

Inkhawmah hian Kolasib SP C Lalzahngoa leh SIRD director Maria CT Zuali te pawh an tel a ni.