HIV veite tan inkhawm buatsaih

People Living with HIV leh Namkwang Church Korean Youth Team, South Korea aṭanga lo kalte chuan nimin khan Synod Conference Centre-ah Unity in Diversity-cum-Advocacy programme an hmang a; Health minister Lal Thanzara'n a hmanpui.

Lal Thanzara chuan, HIV hrik pai chu thihna ang tluk a ni tawh lo tih hriat a pawimawh tih sawiin, "Uluk taka an nun chuan damdawi leh inenkawlna ṭha hnuaiah Pathian zarah mi pangngai ang a an khawsa thei. HIV/AIDS veite nen hian ṭhian ṭha leh chhungkua, unau,
ṭhenawm kan la ni reng a, inen hran chhan tur a awm lo," a ti a; miin HIV/AIDS an vei avangin unaute an nihna a bo loh thu a sawi.

Natna dang veite ang bawka ngaihvena inṭanpui tawn tur kan ni tih hriat chian a pawimawh tih sawiin Health Minister chuan, "Ram changkang apiangah hetianga inen hranna hi a tlem a, keini Mizo, Kristiante phei chu en hranna hi a ti lo tur ber kan ni," a ti.

Korean Youth Team-te hi Rev. Dae Bok Kim te nupain rawn ho a, mi 12 an lo kal. Nimina hun an hmanah hian chawhnu lamah Agapia Social Centre director Rev. Sang Soo Kim chuan thu a sawi.

Korean Youth Team-te hian ASC-te nen an châm chhungin programme duan sa angin hmun hrang hrangah hun an hmang dawn a; February 1, 2016 khian an haw leh dawn a ni.