Covid-19 dan zawm lo 5,533 man tawh
The Mizoram (Containment and Prevention of Covid-19) Ordinance, 2020 bawhchhia nimin zing dar 9 thleng khan mi 5,533 man an ni tawh a, sum chawitir zat belhkhawm chu Rs. 11,95,700 a tling.
May 4, 2020-a hman ṭan Mizoram (Containment and Prevention of Covid-19) Ordinance, 2020 bawhchhia man tawh zawng zawng mi 5,533 zinga 172 chu Ningani zing dar 9 leh nimin zing dar 9 (darkar 24 chhung) inkara man an ni a, chu'ng mite sum chawi zat chu Rs. 35,700 a ni. Dan bawhchhia man mi 172-te chu police man 148 leh local task force man mi 24 an ni.
Darkar 24 chhunga mante chu khawlaia hmai tuamna hmang lo mi 147 (police man 125 leh LTF man mi 22) te, vantlang hmuna social distancing (ft. 6-a inhlata awm) zâwm lo mi pang (police man vek)-te leh, dan dang bawhchhia mi 20 (police man 18 leh LTF man pahnih) an ni. Hetih lai hian, nimin zing dar 9 thleng khan phalna nei loa ramri kân, quarantine chungchanga dan zawm lo leh quarantine facility aṭanga tlanbo man an la awm lo thung.