DC-in MṬKP inkhawmpuina tur tlawh

February 18-21, 2016 chhunga Mizoram Ṭhalai Kristian Pawl (MṬKP) tur, Lawngtlaia CYLA playground chu nimin khan Lawngtlai DC J Hmingthanmawia'n a tlawh.

Lawngtlai DC hian Power & Electricity department, PWD leh PHE department hotute chu inkhawmpui atana an inbuatsaihna hrang hrangte a sawipui. PHE-in tui lakna thar, Greater Lawngtlai Water Supply hmanga khawpui châwm tum a nih chungchangah, harsatna lian a awm loh chuan hman theih an beisei thu leh, enchhin mek a nih thu an sawi.

J Hmingthanmawia chuan, Mizoram huap inkhawmpui lian berte zinga mi thleng tur an nih avangin theihtawp an chhuah zel dawn tih a sawi a, "Tih tur ṭul awm apiangte kan theih chinah kan ti zel dawn a ni," a ti.

MṬKP inkhawmpuiah palai kal thei tur inhriattir mi 8,000 vel an awm tawh niin an sawi.