World Pulses Day hman a ni

Nimin kha World Pulses Day a ni a, Mizoram hmun hrang hrangah hman a ni.

World Pulses Day hi Lung­leiah chuan a vawi khat nan Agri­culture conference hall-ah hman a ni a, district bawrh­sap V Lalsangliana'n a hmanpui. Bawrhsapin thu a sawi bakah, Lunglei MJA president H Lalthansanga leh SDAO Ngurrinsanga Sailo te pawhin thu an sawi a; Lunglei AEO Baby Lalremkimi'n report a pe a, Lunglei ICDS-a nutritionist Lalmalsawmi'n hriselna atana bê (pulse) pawimawhnate a sawi.

Serchhipah chuan Agriculture conference hall-ah hman a ni a, ATMA subject matter specialist K Laltlanmawia'n World Pulse Day chungchang a sawifiah a, Mizorama bê chi hrang hrang awm langsar zual zingah - dâl, chána, kel êk chána, bekang leh betê-te chu hriselna atan ei tam a ṭhat thu a sawi. Serchhip district-ah be chìnna hmun ram hectare 170-a zau a awm thu sawiin, tun aia chíng uar turin kut hnathawktute a chah.

Mamitah pawh DC conference hall-ah World Pulses Day hman a ni a, district bawrhsap Dr Lalrozama'n a hmanpui. Inkhawma tarlan danin, kum 50 hnuai lam mipa tan ni tin bê gram 38 leh hmeichhe tan gram 25 ei a ṭha a, kum 50 chung lam mipa tan gram 30 leh hmeichhe tan gram 21 ei a ṭhat thu tarlan a ni a; bête chu thisen siamtu a ni a, raipuar tan ei tam a ṭhat thu tarlan a ni bawk.