Model village atan hma la ṭan

Lawngtlai West bialtu MLA C Ngunlianchunga'n model village atana a thlan Nghalimlui khuaah model village ni tura buatsaih nan tun hnai aṭang khan hmalak ṭan a ni.

Hmalak ṭanna puala inkhawm community centre-a buatsaihah C Ngunlianchunga chuan, "Hmasawnna hna thawhnaah rilru dik put a ngai. Hri léng vangin kum dang angin kawng hrang hrangah chêt a harsa a, a bial mipuite pawhin hmun dang ang bawkin hri léng vanga harsatna tuar mah se, chhuanchham in awm ka remti lo," a ti a, harsatna an neihte chu a hnena thlen zel turin a chah.

Bialtu MDC (LADC) N Sangnawni chuan, a bial chhung khua model village atana thlan a ni chu lawmawm a tih thu a sawi a, "MLA hmalakna hi mipuite'n an thlâwp tlat chuan rah chhuah hmuh tur a awm dawn a ni," a ti.

Nghalimlui khuaah hian Model Village Committee din a ni a, chu Committee chuan Bialtu MLA nen ṭanghoin, khaw dangte'n an entawn theih turin an khuaah hmasawnna hna hrang hrang thawh an tum a ni.