Republic Day vawi 67-na lawm a ni

Nimin khan India ram pumah Republic Day vawi 67-na lawm a ni a, Mizoramah pawh hmun hrang hrangah lawm a ni. Aizawlah chuan Lammualah hman a ni a, Governor Lt.Gen. Nirbhay Sharma-in hnam puanzar pawt pharhin, parade contingent-te'n hnam puanzar chibai an bûk a chháng lêt.

Governor chuan, Republic Day-ah hian India ram ropui tak chhunga inpumkhatna tinghet tura inhlan thar turin mipuite a sáwm a, "Mizoram hi ram nuam, ram hausa, rálmuang, zahawmna leh hlimna nena kan khawsakna hmun atana siam turin hma lam panin i pên ang u," a ti.

Larsap chuan zalenna sual chhuaktute inpekna hriat thar leh a pawimawh thu sawiin, "He ram ropui takah hian, khua leh tui ṭha tak kan nih angin ram inrêlbâwlna danpui venghimtu, tichaktu leh dan zâwmtu nih i tum ṭheuh ang u," a ti a; Mizo mipuite kumthar chibai bûkin, Republic Day duhsakna a hlan.

Tlawmngai pawl, kohhran, media leh vantlang mipui hnenah lawmthu sawiin Larsap chuan, "Theihtawpin sorkar hmalaknate an thlâwp a, Mizoram hmasawnna atan sorkarin in thawhpui reng tih ka hmuh hian ropui ka ti. He ṭanrualna hi state chakna hnár a ni," a ti a; sorkarin thlawpna a hmuh ṭhat avangin a hmachhawp a tihhlawhtlin ngei a rin thu a sawi.

Governor chuan, Mizoram sorkar chu theihtawpin eirukna leh hlemletna doin a pên chhuak nia sawiin, Lokayukta Bill, 2014 pawh Assembly House-ah pawm a nih tawh thu a sawi a; sorkarin pianphunga rualbanlo, hmeithai, kum upa chak tawh lo, fahrah, natna benvawn neih vanga hnathawk thei lo leh mi chanhaite hamṭhatna tur kawng hrang hrangin a siamsak ṭhin thu a sawi bawk.

Ram râlmuanna, dik taka dan leh hrai lekkawhna leh vantlang tana himna chu thil pawimawh hmasa a nih thu sawiin, Larsap chuan, "Min venghimtu police-te pawh an mamawh hmanraw pawimawh tak tak leh ralthuam tunlai bera thuam ṭhat mek zel an ni," a ti a; CCTV hmanga Aizawl khawpui tuam chhuah tum mek a nih thu a sawi.

Lt.Gen. Nirbhay Sharma chuan, Mizoram sorkarin infiammite tan hmunhma leh hmanraw ṭha ber ber a siamsak ṭhin tih a sawi a, "Ṭhalaite tana khawvel thar hi kan sorkar intiamna a ni. Sorkarin a tih tur ṭha taka a hlen avangin, kum 2014-15 chhung khan national level-ah Mizoramin gold medal 50, silver medal 55 leh bronze medal 76 a la a ni," a ti.

Kawngpui chungchang sawiin Governor chuan, "Kan sorkar hian inkalpawhna kawngpui enkawl leh siamṭhat a ngai pawimawh hle. Kum 2015-16 chhungin national highway 54 double lane-a siam a ni a, kawngpui 79 (km. 1,885) pawh siam leh mek a ni," a ti a; sorkar chuan kawng awm sate ṭha taka a enkawl zel tur thu a sawi.

Aizawla Republic Day lawmnaah hian parade contingent 26-in hnam puanzar chibai an bûk a; chief minister Lal Thanhawla bakah minister, parliamentary secretary, MLA, official, zirlai leh mipui ṭhahnem tak an tel.

Hetih lai hian, sorkar hnathawkte ṭhutna tura dahte erawh ruak a awm nual thung.