Hmun hrang hrangah Republic Day hmang

India ram hmun dang rualin nimin khan Mizoram hmun hrang hrangah Republic Day vawi 67-na hman a ni a; district headquarters pasarihah chuan district bawrhsapte khuallian niin, hnam puanzar an pawt pharh.

Lunglei

Republic Day hi Lungleiah chuan Ṭhuamluaia Mualah hman a ni a, khuallian Lunglei DC Asish Madhaorao More-a'n hnam puanzar pawt pharhin, parade contingent 21-te'n hnam puanzar chibai an bûk a chháng lêt.

Lunglei Bawrhsap chuan, tun dinhmunah Lunglei district-ah NLUP dawngtu mi 22,251 an awm a, first phase leh second phase pek zawh tawh niin, third phase leh fourth phase-a mi 7,738 hnen-ah first instalment pek mek a nih thu a sawi. Kum kal mekah Lunglei district-a MGNREGA job card nei 34,108-te inhlawhna turin cheng nuai 2494.77 pek a nih tawh thu te, kum 2014-15 chhungin RMSA hnuaiah sikul 13 sak belh a nih thute a sawi bawk.

Lunglei DC hian 'President’s Award for Scouts & Guides' dawngtu mi panga hnenah award a sem a; award dawngtute chu - Sacred Heart School zirlai pathum - Judith C Ramdinmawii, Jack Vanlalhriata leh Vanlalhruaia Pachuau te, Chawngfinga Memorial School zirlai pahnih Mika Lalmuanawma leh PC Lalbiaknunga te an ni.

Parade-ah Mizoram Home Guard chu armed contingent-ah pakhatna an ni a, un-armed contingent-ah NCC Airwing BHSS, Serkawn leh school contingent-ah Secred Heart School pakhatna an ni.

Saiha

Saiha District Playground-ah hman a ni a, district bawrhsap Zarzosanga'n hnam puanzar pawtpharhin parade chibai bûk a chhang let.

DC chuan, PHE department-in sikul hrang hrang leh NGO-te nen ṭangkawpin Swachh Bharat Mission campaign an nei ṭhin thu a sawi a, "Rs. 9,88,76,937 sênga Saiha damdawi-in sak mek chu khum 100 awm theihna tura tih a ni a, September 16, 2016-ah zawh hman tura beisei a ni," a ti. DIET building Rs. 1,13,56,132 sênga sak mek chu December 15, 2016-a zawh tum a nih thu te, Saihaa Polytechnic dinna turin administrative building sak nan Rs. 5,01,08,000, hostel sak nan Rs. 1,91,83,000, staff quarter sak nan Rs. 94,78,536 ruahman tawh a nih thu a sawi bawk.

Saihaah hian parade contingents 16 an awm a, school contingent zingah ECM Higher Secondary School chu pakhatna an ni. R-Day pual hian Saihaa sorkar department hrang hrangin an hnathawhte entirna an nei a; Tableau Show-ah hian DVO chu pakhatna an ni.

Lawngtlai

Lawngtlai Vengpui khelmualah hman niin, bawrhsap J Hmingthanmawia'n hnam puanzar a pawt pharh a, parade contingent 13-in hnam puanzar chibai an bûk.

J Hmingthanmawia chuan, Lawngtlai district-a sorkar hnathawhte sawiin, "Lawngtlai District Hospital OPD hawn theih ṭep a ni tawh a, khum 50 awm theihna tur hospital building pawh sak ṭan thuai a ni ang," a ti. Lawngtlaiah Greater Water Supply Project kalpui mek a nih thu te, Kaladan Multi Modal Transit Transport Project-ah Mizoram chhung bikah hna 62.02% thawh zawh tawh a nih thu te, Lawngtlaiah in nei lote tan kum 2015-16 chhungin mi 95 tan in sak tum a nih thute a sawi.

Lawngtlaia Republic Day lawmnaah hian sorkar hnathawk, zirlai, tlawmngai pawl leh kohhran hruaitute leh mipui ṭhahnem tak an tel a ni.

Serchhip

Khawtetlang khelmualah hman a ni a, district bawrhsap Dr Lalrozama'n hnam puanzar pawt pharhin, parade contingent 14-te chibai a bûk.

Dr Lalrozama chuan, Serchhip district-ah NLUP first phase leh second phase sem zawh a nih tawh thu leh third phase leh fourth phase sem mek a nih thu a sawi a, "RKVY kaltlangin WRC I leh II hnuaiah ram hectare 78-a zau enkawl a ni," a ti. Kum kal ta chhungin National Rural Drinking Water Programme hnuaiah North Mualcheng, Tlangmawi, Sailulak leh Vanchengteah tuilakna tihfel a nih thu leh district chhunga elementary school 111-ah inthiarna thar sak a nih thu a sawi bawk.

Serchhipah hian parade armed contingent pahnih, unarmed contingent pahnih leh school contingent 10 an awm a, scghool contingent zingah Marian High School chu pakhatna a ni. R-Day pual hian 166 BSF-te chuan an ralthuamte mipuite hmuh turin an pho chhuak a; nimin zing khan JNM Hospital Poor Fund, Salvation Army Old Age Home, Adult Rehabilitation Centre leh Shalom Special School-ahte thilpek hlan a ni.

Mamit

Mamit GSA Playgroundah hman a ni a, Mamit DC Lalbiaksangi khuallian a ni. Lalbiaksangi chuan, Mamit district-a chhungkaw 11,393 hnenah NLUP
ṭanpuina pek tawh a nih thu te, an district-ah kum 2015 chhungin oil palm metric ton 1797.25 thar chhuah a nih thu te, RMSA hnuaiah sikul 12 sak thar a nih thu te, in 23,621-ah thosi hlo (DDT) kah a nih thute a sawi.

Mamita R-Day lawmnaah hian parade contingent 13 an awm a, armed contingent pakhat, unarmed contingent 11 leh pipe band pakhat an ni. School contingent zingah St. Francis of Assissi School boys contingent chu pakhatna an ni a, JNV School leh New Diamond School-te'n an dawt.

R-Day pual hian Mamit DC chuan Mamit District Hospital-a damlo awmte leh Shelter Home-a naupangte tlawhin, thilpek a hlan a ni.

Kolasib

Kolasib Ṭumpui khelmualah hman niin, district bawrhsap H Lalengmawia khuallian a ni a, hnam puanzar pawt pharhin parade contingent 16-te chibai a chháng lêt. DC chuan, "Inpekna thûk leh sang zawk nen kan thawh a ngai a, inchhém alh tawn ila, kawng engkima hma hruaitu district nih tum ila, Zoram nuam kan siam thei ang," a ti.

H Lalengmawia chuan, an district chhungah NLUP ṭanpuina dawngtu chhungkua 11,372 an awm te, nikum January aṭanga December thla tír thlengin an district-ah thubuai 273 ziah luh niin, chung zinga 209 chu chinfel a nih thu te, kum 2015 chhungin an district-in oil palm metric ton 1825.522 an thar chhuah thute a sawi a; midday meal hnuaia sikul 180-a zirlai 12,514 hnenah chawchhûn pek chhunzawm zel an nih thu a sawi bawk.

Kolasib-ah hian uniformed contingent zingah Excise & Narcotics contingent pakhatna an ni a, school contingent zingah JNV, Thingdawl pakhatna an ni. Sorkar department 14-in an hnathawhte tableau hmangin an pholang bawk.

Champhai

Champhaiah chuan Chhangphut Field-ah hman a ni a, district bawrhsap Vanlalngaihsaka khuallian a ni. DC chuan, Champhai district-ah NLUP thawh thumna leh thawh lina kalpui mek a nih thu a sawi.

Vanlalngaihsaka chuan, kum 2014 aiin kum 2015-ah police station-a thubuai ziah luh 33-a a tlakhniam thu te, Greater Champhai Water Supply Scheme hnuaia chhungkaw 3,700 hnenah tui connection pek a nih tawh thu a sawi a; Champhai district chu pipute thil hlu tamna a ni tih sawiin, "Champhai district hi a chhunga chengte'n mi tin tlawh châk leh hmuh chak, nuam an tih a nih theih nan 'Destination Champhai' ah kan siam a ngai a ni," a ti.

Champhaiah hian parade contingent 30 an tel a, armed contingent pakhat, unarmed contingent pasarih, school contingent 21 leh pipe band pakhat an ni. School contingent zingah BC English Academy chu pakhatna an ni. R-Day pualin office hrang hrangin sum an thawhkhawm hmangin damdawi-in leh home hrang hrangah DC-in ṭanpuina a hlan bawk.

Khaw dang / hmun dang

Hnahthialah pawh HBSC Ground no. I-ah Republic Day lawm a ni a, Hnahthial SDO (C) Kannan Gopinathan chu khuallian a ni. Khuallian hian hnam puanzar pawt pharhin, school parade contingent 12-te'n hnam puanzar chibai an bûk a chháng lêt a, thu a sawi bawk.

Sangauah chuan BDO pisa tualah hman a ni a, sorkar hnathawk leh zirlai ṭhahnem tak an tel. Republic Day pual hian Sangau-III community hall-ah a thlawna inentirna buatsaih a ni a, mi eng emaw zat an inentir a ni.

East Lungdar-ah pawh zing dar 7-ah Bazar kâwnah R-Day hman a ni a, BDO C Laltleipuii'n hnam puanzar pawt pharhin, parade chibai bûk a chháng lêt. Inkhawmah hian East Lungdara zirlai, sorkar hnathawk leh khawtlang hruaitute an tel.

Republic Day hi Mizoram University pawhin an campus-ah an hmang a, vice chancellor Prof. R Lalthantluanga'n hnam puanzar pawt pharhin thu a sawi a, MZU-a thawkte leh zirlaite an tel a ni.

Missionary Training College, Mission Vengthlangah pawh Republic Day hman a ni a, khuallian Vanlalzawma, MLA-in hnam puanzar a pawt pharh.