KHAWTHLIR

Thisen pe

Student Christian Movement of India, Aizawl Theological College unit chuan nimin khan blood donation camp an huaihawt a, Synod Hospital tan mipa 33 leh hmeichhia pathumin thisen unit 36 an pe.

MJA thingpui

MJA general headquarters chuan vawiin chhun dar 12 hian Aizawl Press Club-ah inhlan tharna leh kum thar thingpui inhona hun an hmang dawn a; MJA member, Aizawla awm mekte chu tel vek turin an inhriattir a ni.

Mizoram map hâl

Joint Action Committee on Inner Line Forest Reserve chuan Mizoram map siamṭhat phûtin nimin khan MZP office kawtah Mizoram map an hâl. An tarlan danin, Inner Line Forest Reserve area sq.mile 509, Cachar Forest Division-in an enkawl mek chu Mizoram chhung a nih laiin, Mizoram map-ah tihbo a niin an tarlang. Map hâlnaah hian JAC president Vanlalngaia bakah, MZP, MSU, Zofa Welfare Organisation leh Revolutionary Democratic Party aiawhte'n thu an sawi.

R Day quiz

Republic Day pualin 'National Integration and Communal Harmony' tih thupui hmangin Aizawl District School Level Essay Writing Competition buatsaih a ni a, a tiṭhate hnenah nimin Lammuala Republic Day lawmnaah lawmman sem a ni. Lawmman dawngtute chu pakhatna Ramropuii Ralte, Sihphir Venghlun H/S a ni a, pahnihna chu Ruthi Lalthanzuali, Govt. JL High School niin, pathumna chu Joseph Lalremsanga, Govt Comprehensive Model H/S a ni.

Car chesualah thi

January 25, 2016 zan dar 6:30 vel khan Seling dáiah Maruti car MZ-01 A-6585 chesualin, kawng thlangah metre 100 vel a lum a, Vanlalthuama (65), Khawruhlian chu damdawi-in panpui a ni laiin a thi. Car khalhtu Laldinliana (45), Zonuam a hliam bawk.