Kum 2012-2015 chhungin mi 25 kâng hlum 2015-ah Aizawl dist-ah leiminIN in 103 tichhia
Aizawl District Disaster Management Authority (ADDMA) chhinchhiah danin, kum 2015 chhung khan Aizawl district-ah leiminin in 103 a tichhia. In chhia zinga 63 chu a puma chhe vek a ni a, a pumpuia chhe lo in 19 awmin, chhe ve nial nual in 21 a awm. Hetih lai hian, kum 2012 aṭanga 2015 chhung khan Mizoram pumah kângmei vangin mi 25 an thi.
Khualrêl chhiatna
Nikum khan Aizawl district-ah thliin in a tihchhiat 289 a awm a, chung zingah chuan chhe vek 35 awmin, a puma chhe lo in 223 leh chhe ve nêl nual in 21 a awm. A puma chhe si lo zingah hian thlám a tam ber a ni.
ADDMA chhinchhiah danin, in kâng 52 a awm a, chu'ng zinga 27 chu a pumin a kâng chhe vek a, kâng chhia ziaawm deuh 25 leh chhe nasa lutuk lo in panga awm. Lirnghing vanga in chhia, hmelhem deuh report pakhat a awm a, mihring fimkhur loh vanga chhiatna thleng (man made calamity) vanga in pumpui chhia pakhat a awm bawk.
Thli, ruah leh rial tla vanga chhiatna hi nikum April thla khan a thleng tam zual a, April 3 leh ni 19-22 inkar vela Mizoram hmar lam tlangdunga ruah leh thliin a tihchhiat an tam hle. August 26, 2015 zana ruahsur nasa taka avangin Mizoram hmun hrang hrangah lei a min a, kawngpui a ping nual.
Ramhlun Vengthar leh Ramhlun Venglai thlânmual leh Chaltlang North thlanmual a min a, Hunthar Vengah lei a tlakhniam belh bawk. Ramhlun Vengthar thlanmual minah thlân 137 a chhia a, Chaltlang North thlanmual minah thlân 77 a chhe thung.
ADDMA hian chhiatna hrang hrang an chhinchhiahte chu zonal officer 12 kaltlanga an dawn a ni. Khuarel chhiatna tuartute chu District Disaster Management Board-in chhawmdawlna a pe ṭhin a, mihring chenna ni lo (e.g. thlâm)-te erawh chu chhawmdawlna pek a ni lo. Thlám ṭhenkhatte erawh chu chenna atana hman a nih vangin, a chhia a nih chuan ṭanpuina an pe tho bawk.
Kângmei chhuak
Fire & Emergency department chhinchhiah danin, nikum chhung khan December 20 thlengin Mizoram pumah in kâng 44 a awm a, ram kâng hmun 127-ah a chhuak. Kângmei vanga thi 5 leh hliam 6 an awm.
Kum 2012-2015 chhunga kângmei vanga bungraw hloh zat chu Rs. 28,35,13,090 hûa chhût a ni a; kâng ṭhelhtute'n bungraw kâng tur an hum zat chu Rs. 69,11,05,006 hûa chhut a ni.
Fire & Emergency Services director Neihchungnunga chuan, khua a ṭhál chhoh leh ṭan a, kângmei laka fimkhur turin mipuite a ngen.
Neihchungnunga chuan, kângmei chhuak a awmin rang taka kâng ṭhelhtute hriattir an nih lohin a pawi thui hman ṭhin tih sawiin, kângmei chhuak a awm chuan Aizawla Fire station number 101 leh 0389-2322384 emaw, Kulikawn Fire station phone no. 2312000-ah rang taka hriattir turin mipuite a chah. Kângṭhelh motor kal velte kawng kian zung zung tur leh in kâng awmna chhehvelah thawktute dîpdâla awm lo turin mipui a ngen bawk.
Zawhna chhangin Fire & Emergency Services Director chuan, "Kângmei a chhuah chuan a hre hmasa berte chu mipui, ṭhenawm khawvengte an ni. Mipuiin min thlawp ṭhat viau laiin kan pipe hmante leh bungruate hi kalhmang bik neia hman tur a nih vang hian mi náwlpuiin min puih ve an tum hian hna a buai awl a, kâng ṭhelhtute ring tâwk turin mipuite ka ngen a ni," a ti.
Environment & Forest department chhin--chhiah daninm kum 2015 chhung khan Mizo-ramah ram kâng ṭum 230 a thleng a, ram kâng zau zawng chu hectare 4542.75 a ni. E&F department enkawl chinah Thenzawl DFO hnuaiah ram hectare 5-a zau a kâng a, a dang zawng hectare 4537.75 a zau chu ramhnuai, E&F enkawl loh a ni.
Ram kângin thing ṭha a tihchhiat hlut zawng chu Rs. 12,34,600 hua chhût a ni a; ram kan chhan tam ber chu lo hâlin a man kai a ni ber a, a chhan hriat loh a awm bawk.
Hetih lai hian, Divisional Forest Officer (DFO) hrang hrang zingah, Darlawn DFO, Dampa Tiger Reserve, Chhimtuipui leh Wildlife (Aizawl) DFO bialah ram kâng chhinchhiah a awm lo.
Fire Statistics 2012-15 (Dec. 20, 2015)
Kum In kâng Ram kâng Thi Hliam Kâng chhia hlutna Hum hman hlutna
2012 162 114 9 16 Rs. 18,60,68,350 Rs. 12,35,06,460
2013 161 186 3 15 Rs. 4,16,65,180 Rs. 28,15,66,056
2014 91 190 8 4 Rs. 4,34,20,600 Rs. 25,00,14,200
2015 44 127 5 6 Rs. 1,23,58,960 Rs. 3,60,18,350
Total 458 617 25 41 Rs. 28,35,13,09 Rs. 69,11,05,066
2015-a DFO hrang hranga ram kâng
DFO Kâng zat Zau zawng A chhan Tihchhiat hlutna
Aizawl 24 Hectare 104 Lo hâl Chhût loh
Mamit 17 Hectare 392 Hriat loh Chhût loh
Darlawn - - - -
Kolasib 41 Hectare 1137.6 Lo hâl Chhût loh
Champhai 42 Hectare 773.85 Lo hâl Rs. 1,82,000
Kawrthah 9 Hectare 3.6 Lo hâl -
Thenzawl 1 Hectare 5 Lo hâl -
Lunglei 60 Hectare 1139.5 Lo hâl Chhût loh
Tlabung 6 Hectare 78 Lo hâl Rs. 1,47,000
Chhimtuipui - - - -
N.Vanlaiphai 18 Hectare 909.2 Lo hâl Rs. 9,05,600
Dampa - - - -
Wildlife (Azl) - - - -