Sipai ṭan tumte tana training khâr

Youth Vikas Society (YVS) leh 39 Assam Rifles ṭangkawpin Mizo ṭhalai sipai ṭan tum tana pre-recruitment training an buatsaih chu Thawhṭanni khan 39 AR Loch Hall-ah khâr a ni a, Mizoram Youth Commission (MYC) chairman T Sangkunga'n a hmanpui.

T Sangkunga chuan, Mizo ṭhalaite tana pre-recruitment buatsaih a ni chu lawmawm a tih thu sawiin, "Sipaiah Mizoram quota 20% pawh hnawhkhah zawh loh a ni chunga sipai battalion tina hnam khat chhiara a tam ber kan la ni thei a, chutih laiin quota luah khat zo tura ṭan lak a ṭul," a ti a; sipaia ṭan tumte chu an tling a nih chuan lunglen vang mai maia tlanbo lo tur leh chhel taka training chhuak turin a fuih.

39 Assam Rifles second in command Lt.Col. Thomas George chuan, sipaia intlar tumte chu theihtawp chhuah leh mahni inthunun ṭhat a pawimawh tih a hrilh a, Assam Rifles bik lâk rûnpui neih dawnah a theih anga Mizote duhsak tum an nih thu a sawi.

Youth Vikas Society president Dr Lalengzami tarlan danin, Assam Rifles nena an thawhhona avangin Mizo ṭhalai 96 chu sipaiah an tling tawh a ni.